大家都知小妹想冬天去浸溫泉度蜜月，除咗想去北海道之外，台北嘅溫泉係其中一個選擇，貪其平靚正。香港人熟悉嘅有烏來、陽明山、新北投嘅溫泉區，而新北投嘅交通最方便，佢哋新一屆嘅「湯花戀2007台北溫泉季」早幾日開幕，推出唔少浸溫泉優惠。
心郁郁，好想book，點知台灣《壹週刊》老友報料話，佢哋喺新北投10間著名嘅溫泉酒店抽取溫泉水（白磺溫泉）化驗，包括水美、太平洋北投、亞太、春天、美代、泉都、荷豐館、嘉賓閣、漾館、京都。根據台灣經濟部訂定嘅白磺泉水標準，含有總溶解固體量，必須達到500mg/L以上，或硫酸鹽含量達250mg/L以上，先可以叫做真正嘅溫泉，但檢驗結果發現，冇一家達到標準。不幸中之大幸，好彩驗唔到有大腸桿菌。
老友話，其中溫泉水最淡嘅係水美溫泉會館，啲溫泉水只係比一般熱水好一啲，詳情可以睇今期嘅台灣《壹週刊》。
吓，咁都得，收到咁貴原來同冲熱水凉冇乜分別，咁幫襯佢做乜？不如叠埋心水去北海道。
逢周一至周四刊出