噚日華華睇完Joyce（647）嘅通告，不禁一聲長嘆，Joyce會唔會從此失去「Joyce」嘅靈魂？其實呢個通告相當簡單，只係話主席馬景華、行政總裁馬郭志清JoyceMa，同總裁兼董事總經理馬美儀一齊辭任，只會擔任集團非執行董事。會德豐（020）副主席吳天海會接任做非執行主席。
不過，對於「名牌奴隸」華華嚟講，通告背後意義可以好大，馬景華係JoyceMa老公，馬美儀係佢哋個女，馬家3個人齊齊起身，意味馬家喺Joyce嘅影響力冇乜剩。其實，自從2000年，會德豐全面收購Joyce，已經有人問，Joyce會唔會變咗連卡佛？過咗7年，會德豐今次可以話「正式」入主。
華華仲記得當年GiorgioArmani、Dolce&Gabbana、HugoBoss呢啲名牌，都係由創辦Joyce嘅JoyceMa一手引入香港，華華問過時裝人，佢話Joyce係香港嘅時裝王國，而JoyceMa就係當中嘅女王，時裝王國冇咗女王，你話會點？