中信泰富（267）先後分拆咗中信1616（1883）同大昌行（1828）上市，兩隻股都冇運行，一隻「浮潛」，另一隻認真啲玩「水肺潛水」、即係潛得深啲。噚日中信泰富董事總經理范鴻齡出嚟，除咗行動上撐中信1616，注入CPCNet，當有記者問佢會唔會都注資入大昌行時，佢有啲無奈咁答，呢個係不幸，股價表現唔係管理層可以控制，仲話對大昌行嘅小股東好抱歉，未能令佢哋即時獲利。
跟住佢就話，其實大昌行管理層做咗好多嘢，大陸嗰邊嘅業務進展順利，有多個項目進行緊，希望不久嘅將來可以話畀大家知。
大昌行上市後，股價一路跌，噚日跌市佢亦跌近7%，得番3.88銀，睇嚟小股東要好似鄺美雲嘅經典金曲咁《再坐一會》。