澳門特首鏵哥噚日發表施政報告，一如所料佢大手筆派糖希望平息民怨，近排佢面對內憂外患，真係頭痕到爆。噚日八方個同事問佢上任八年，有乜最開心嘅事同最唔開心嘅事，鏵哥好似好大感觸咁，略一沉思先答，話做特首呢個位，唔太追求個人開心或唔開心先容易做。近排最開心嘅事，就係好多朋友知佢為食，送咗啲由土生葡人整嘅雲石蛋糕畀佢品嚐，佢前晚食咗一件，由於太好味，忍唔住口食多件。
「厚鏵八年」與港相似
獨食難肥，鏵哥話佢都有同下屬分享蛋糕。大餅一個人食晒難免惹人眼紅，唔分啲畀人點服眾？八方唔知佢咁講有冇微言大義，之不過佢開水喉都係慷他人之慨，唔係自掏腰包派糖。香港人經歷「建華八年」，文革曾都話「惶恐」，數數手指，原來澳門亦到「厚鏵八年」時刻，兩地情況雖然有好大差異，但亦都有唔少驚人相似地方。第一係上街示威者日眾，今年5.1，澳門逾萬人遊行，「抽水哥」一槍驚醒澳門繁華夢；上個月1號再有萬人上街高呼「何厚鏵下台」，嚟緊12.20回歸周年日，據講又有大型遊行。
第二係惡法失民心，23條激發港人群起反對，澳門人則視大幅提高違例停泊電單車罰款係苛政，事關澳門電單車位不足，政府嚴厲抄牌罰錢，形同㩒住搶，大家唔反勢係假。此外，𠵱家審緊嘅歐文龍案矛頭直指鏵哥，雖然同當年阿松偷步買車案情差天共地，不過主要官員涉及利益醜聞，市民不滿實係通通發洩到特首身上，結果50萬人上街係老董落台最後一根稻草，稻草幾時落在鏵哥身上就唔知嘞！
鏵哥身體狀況如何，有冇腳痛八方唔知，但北京換馬之說早前確係不脛而走。有澳門學者同八方講，相信北京唔會好似撤換老董咁要鏵哥落馬，因為不滿老董嘅港人遍及各階層，唔換人能否有效管治都成疑問，澳門則尚未到全民反鏵地步，睇嚟冇必要貿然換人。
換馬隨時亂上加亂
另一位同澳門各路人馬、政商界都有交情嘅香港政治人物就話，以佢了解北京確係搵人評估過各種換馬方案，結論係大局為重，突然換人可能挑起唔同利益集團紛爭，屆時仲麻煩。八方記得老董腳痛都毫無徵兆，鏵哥仲可以企幾耐，總之阿爺自有分數。