華華大膽估，呢期城中最精神爽利嘅富豪，應該係東亞（023）主席李國寶。正所謂「人逢喜事精神爽」，寶哥哥今鋪喜事打孖上，仲唔爽上加爽。
第一件喜事就係關於佢單官司。寶哥哥今年都唔知係咪流年不利，年中時因為道瓊斯內幕交易案，俾美國證監會起訴，惹上官非，不過，據來自上流社會、未經證實嘅消息，寶哥哥單官司好似「大步檻過」，冇事！華華求證於寶哥哥本人，佢好gentleman咁答：「多謝你，我完全唔可以答得你呢件事。」
東亞股價反彈贈興
其實，之前英國有報道話，美國證監會向寶哥哥提出庭外和解嘅方案，但寶哥哥為要「捍衞清譽」，冇接受到。今趟如果華華冇收錯風，寶哥哥可以話勝出漂亮一仗，咁仲唔係喜事一樁？
至於第二件喜事，唔使華華多講啦，咪就係佢層歌賦山里超豪洋房，啱啱以呎價三萬五賣咗，7個月袋二千幾萬。運勢要配合風水，寶哥哥運轉亁坤，唔知歌賦山里層樓嘅風水係咪同寶哥哥唔係咁夾，所以賣咗層樓呢？堪輿學家麥玲玲講，通常買賣自住層樓，涉及磁場，先至會同自己風水運程直接有關。咁睇怕寶哥哥賣樓純粹係投資決定。不過，麥師傅話家陣賣樓都好，可以幫佢轉轉運。
麥師傅仲話，寶哥哥屬土，適宜住中環同淺水灣，所以佢家陣住嘅中半山帝景園都會幾利佢，但如果諗住搬屋就千祈咪諗搬去東區或者東半山，因為向東屬木，木剋土，不利寶哥哥。
除咗呢兩件喜事，噚日東亞嘅股價仲跟隨大市反彈，收報48.3銀，升咗4毫半，近1%。算係同主席贈興！
出年犯太歲宜辦喜事
華華問過堪輿學家麥玲玲（圖），佢讚寶哥哥面相平均，國字面，有利事業同人生發展，唔怪得佢檔東亞銀行咁好景，內地大開分行，股價一年間升約三成！麥師傅仲話，寶哥哥嘅眉、眼、顴骨同鼻位都好靚，只係嘴唇薄咗啲，下巴短咗啲，但有雙下巴補救，所以唔需要太擔心。
寶哥哥1939年出生，虛齡69，屬兔，今年係丁亥年，有官符星，容易惹官非，所以出咗單道瓊斯內幕交易案，不過，既然傳聞話搞掂咗，咁華華就梗係問寶哥哥出年運程。似乎唔係咁好噃，出年係鼠年，寶哥哥犯太歲，兼踏入轉角運，宜動不宜靜，麥師傅叫佢辦吓喜事冲喜吓。中國人傳統嘅喜事當然係結婚、生仔同買樓，身家豐厚嘅寶哥哥最易辦嘅，就梗係買樓。以寶哥哥嘅眼光，一買一賣、貨如輪轉，喜事自然接住嚟。
持貨7個月賺$2280萬
樓市暢旺，豪宅樓價狂升，李國寶把握時機，高價賣咗喺山頂歌賦山里嘅獨立洋房（圖），成交價高達2.028億銀，洋房面積5657方呎，平均呎價成35849銀。
據土地註冊處資料，寶哥哥今年3月28號，以1.8億銀，向吳光正嘅會德豐地產（049）買入歌賦山里3B號董事屋。華華好佩服佢嘅投資眼光，持貨7個月，賬面賺成2280萬銀。接貨嘅買家陳文衛同陳文正，聽講係銅鑼灣柏寧酒店陳氏家族成員。
寶哥哥仲持有自住嘅中半山帝景園二座頂層複式單位，係1991年用1449萬銀買入，面積約6700平方呎，據地產經紀講，家陣起碼值兩萬五蚊呎，即係個盤市值1.68億銀，17年升值10倍。
電郵：mailto:[email protected]
