開始入冬，海灘冷冰冰，以為人影都冇隻？完全錯晒。X-Game大熱，10月開始先係香港的浪季。大浪灣人頭湧湧，一班浪友由朝到傍晚分段殺到。全因東北季候風的力量，令食正東北風的大浪灣，越凍越熱鬧。今日作出最好的準備，一齊投入香港這個瘋狂浪季！
記者：許維雅 攝影：陳陶鈞
成班滑浪友踏入10月就最開心，因為一星期起碼有4至5日夠大浪，一有時間就把握機會衝去大浪灣瘋狂一番。
（左起：柏林、Kenji、Jay、Paul、Moe、K、梁志恆、家銘）
人多浪少爭崩頭
要數香港至Hot水上活動，滑水跟滑浪可謂叮噹馬頭。儘管環境不利，但學滑浪的人數依然增加。全因與大自然的接近，每次捉摸浪勢的刺激，都跟滑水不同。最重要係浪是免費的，買塊板已經可以任滑，冇滑水租船咁燒銀紙。滑浪人數近年倍增，但香港可滑浪的地方真係3隻手指數晒。大浪灣係第一熱點，其次有西貢大浪西灣，呢兩個灣浪大但只限吹東北風，即秋冬先開始大浪。第3個係長沙，只限夏天吹東南風。
要滑浪，先要上天文台網站Check吓風級要達4至5級以上。夏天一個月只有幾日適合，所以香港的浪季係冬天。但香港海灘太細，人多，個個爭浪玩。一班滑浪友更解釋由於海床太平，浪並非「八」字散開，平面不夠。所以颱風係滑浪狂人的至愛，因為浪夠大夠力，雖然危險，但佢哋見到都會衝去玩！
滑浪逐格睇
點解愛衝浪？
Chris（浪齡10年）
X-Game滑浪導師Chris：「曾經喺外國滑浪時有海豚游喺身邊、睇鯨魚，其他運動未必可以同大自然咁親近。」
家銘（浪齡3年）
感覺夠Free，更覺得滑浪係減壓好方法。年青人愛滑浪，可以蒲少啲，又慳錢又健康。
Moe（浪齡7年）
「有啲咩唔開心嘅事，只要出海，等浪時會忘卻一切煩惱，有洗滌心靈的作用。試過到峇里滑浪，俾浪衝斷板，同時又夠晒刺激。」
阿禮（浪齡3年）
「刺激、舒服、爽及寧靜足已形容滑浪的感覺！」
Kenji（浪齡9年）
「細個時見到已經覺得好有型，鎖定目標大個必試。滑浪好High、快，感覺夠自由。試過8號風球玩，浪太密，有次差啲浸死！」
梁志恆（浪齡10年）
全因一套《終極豪情》愛上滑浪。為了滑浪，返夜班都不惜放工衝去海灘玩，於沙灘Hea，再返工。「有時早上6、7點滑浪，更High到玩全裸滑浪，勁興奮勁Free。」
即Check！衝浪裝備
除一般海灘用品之外，滑浪板自然唔少得。選購滑浪板最重要係適合自己身形。由於香港浪季於冬天，保暖的Wetsuits亦唔少得。除此之外，一條腳繩、蠟及一些防曬用品都十分重要。
學板前必讀三式
1.報滑浪班
想學滑浪，可以到X-Game報一些滑浪班，收費$500一個人，至少兩個人以上開班，內容包括一小時理論、兩小時實習。3日前打電話到大浪灣Surf360預約亦可，收費$450。
2.唔買板可租
大浪灣側有幾間士多提供Locker出租服務，大Locker收費$150一個月。初學者試玩又唔想買板，可以租板，收費約$50一日。
3.學識出國滑
香港滑浪地點有限，滑浪發燒友經常到世界各地滑浪，滑浪熱點包括菲律賓、峇里及台灣。詳情可留意XGame網址。（ http://www.xgamehk.com）
店舖查詢：
a/X-Game（22643088）
旺角朗豪坊9樓25-31號舖
b/Surf360（60360360）
大浪灣海灘側斜路
c/棠記士多（28094005）
大浪灣海灘側斜路