蝙蝠俠大鬧中環，個個爭睇，黑色美學傾倒眾生。雖然新版蝙蝠車未有曝光，但近期一樣有架黑武士踩入香港！呢架Lotus豪華版EuropaS，全黑車身不特止，連19吋胎軨、散熱網全部換埋黑色，車櫳更由膠變真皮，淡化Lotus硬性跑格，比蝙蝠車更多一份柔情。仲有，豪華版加大25匹馬力，強上加強，棍棍去盡力量湧住出。坐上車，手轉波、腳踩油，大能即刻與我同在！
文：嘴嚼爺
攝影：陳盛臣
Model：Fion
公子硬跑全港僅兩部
改裝Kit要4萬蚊，足夠買起我架錢七，但係畀得起蓮花EuropaS車價60幾萬，4萬蚊真係「冰山一角、跌咗唔覺」。其實應該係話你買得EuropaS，已經冇得揀。你可以話自己鍾意紅白藍而放棄全黑車身，亦可以唔計較嗰25匹馬力，但係，冇可能抗拒全真皮內櫳嗰份豪華感，仲有，加裝EngineStart及尾箱開關掣，華實兼備。
而且，本身EuropaS硬倔倔跑格，避震硬機械感強都冇得投訴，𠵱家難得門檻、桶椅至中控台都用上軟熟真皮，舒適感更強，可算喺公子車同硬跑中攞到平衡。
最矜貴之處，在於呢隻奶茶色內櫳，更係香港代理搵Lotus原廠度身定做，全港只有2架，其中1架一到港已賣出，想做黑武士唔該快手畀錢，60幾萬之嘛，邊係錢嚟㗎？
增強中置引擎
細個砌跑車模型，都必揀引擎喺尾窗露出嘅法拉利，呢架EuropaS都係中置引擎，個人喜好覺得非常有型。中置引擎配尾輪驅動，具備玩甩尾嘅先天條件，帶住入彎令人感覺到佢圓滿嘅操控性。
EuropaS棄用豐田1.8公升引擎，改配歐寶AstraOPC2公升Turbo引擎，扭力更強猛，呢架豪華版更補一補，加多25匹馬力。官方數字顯示，普通版0-100km/h要用5.9秒，加多25匹之後，只要5秒鐘。老實講，揸上手無論呢25匹或者嗰0.9秒都係唔多覺，但係由於本身都有200匹馬力，配上6前速手波，轉波踩油有聲有畫面，貫徹蓮花車系實淨跑車風格。
不過講到尾，都係外形最吸引，低扁流線王，配上全黑車身，仲型過蝙蝠車喇，揸去中環唔知有冇人圍住我影相呢？
加4皮嘢有幾豪？
唔只車身，19吋合金胎軨都係全黑，型就真係型，不過稍嫌少咗蓮花味。
雖然都係跑車桶椅，但相比普通版，真皮全桶椅齋睇都知舒服好多。
改裝版加入呢粒尾箱開關掣，開尾箱毋須熄車再攞條車匙落車開，方便好多。
增設貴跑必備Start掣，不過冇免匙系統，只係撻車由扭變㩒，型囉……
幾個網狀散熱入風位都係銀色，為全黑車身點綴出金屬美感。
LotusEuropaS豪華版
引擎：1,998c.c.直4＋Turbo
馬力：225ps/5,400rpm
扭力：30.5kgm/5,000rpm
傳動：6前速手動
驅動：中置引擎，後輪驅動
0-100km/h：5秒
查詢：RichburgLotus（28770810）
