此日午飯茶座上來了一位稀客，乃老賓架G，本以為佢一早退咗休，卻原來當今銀行大勢，乃私人銀行業務（PrivateBanking）與財富管理為主流，雖然私人銀行部門聘請咗大量年青才俊，但銀行點都要搵番幾個老鬼鎮住後防先，起碼啲老鬼與大富豪或大富豪近身助手有番二三十年交情，必要時講說話容易啲，勝過啲後生仔。賓架G一早轉軚做私人銀行部，仲有排搵。
賓架G做乜事從紐約飛嚟香港呢？佢話二十幾年前佢在化學銀行（正式名稱為美華銀行）工作之時，駐過馬尼拉，當日好多菲律賓朋友/客戶已經成為巨富，故此雖然佢嘅負責範圍係歐洲，銀行仍然派佢去馬尼拉維持關係，此乃老鬼有用之處也。賓架G間銀行後來不斷合併，卒之演變成為今天之JP摩根大通，冇人記得當日有間化學銀行咯。賓架G話當年有人笑佢，「世界上有所謂bloodbank（血庫），spermbank（精子庫），甚麼是Chemicalbank？」佢要花一番唇舌去解釋。其實佢哋當時有一句宣傳口號深入民心，該雙關語十分到家，就係「Whenitcomestobanking,thereactionischemical!」經過一連串合併（merger），呢句口號早已煙消雲散。
賓架G經歷多次合併，卒之到JP摩根與大通合併之時，佢要離開，賓架G講：「你要記住merger呢個字，以Me（我自己）行先。」騎騎，凡有merger，大老闆（主席，總裁等話事人）就會同投資者講，合併會產生協同利益（synergy），協同利益其實係炒魷魚代名詞，兩間銀行、兩間機構合併，唔炒番三幾千人（譬如公關、會計、經濟研究等等部門，梗會只係留番一個），點可以將合併合理化呀？
問賓架G：「香港有邊位同事你會記得起呀？」賓架G話：「FredMa啦，當年喺大通，佢係香港私人銀行主管，有一次我哋搞環球私人銀行主管聚會，每人要上台表演，FredMa識得自嘲搞幽默，十分唔容易，我對佢有深刻印象，佢後來好似去咗電訊公司噃。」即刻話畀佢聽，FredMa現在係大官，好識得上台致詞臨時爆肚！