最近呢個零禮拜，港股每隔一兩日，就嚟一次「大屠殺」，噚日恒指又大跌過千點，最低時跌1315點，收市跌1117點，期指更大跌1244點，又變番低水；唔計窩輪嘅下跌股超過950隻，早輪大旺市時就百花齊放，家吓就百花俱殘。
股市大上大落，成交日日過千億元，噚日亦接近1400億元，股票行生意做唔切，而北水仲係源源不斷咁流入，各地大財團都吼實香港股市呢個大平台，早輪杜拜基金先入股新鴻基公司（086），但其實更心急嘅反而係內地嘅大銀行同證券行，佢哋呢輪已頻頻出動，搵香港股票行合作，進入呢個前景極度樂觀嘅市場。
結好控股（064）噚日在大跌市中就逆流而上，最高成過1元，收0.96元，升1仙，成交有1.5億股，買盤好有「食力」，唔排除有中資在大手吸納。睇前景，結好若「斟掂」同內地銀行或證券行合作，即時可把握北水自由行的機遇，如虎添翼。
股市旺佣金收入增
中資睇中結好，當然有因，佢生意做得大唔在講，主要係佢在咁多上市股票行中，股價最偏低，以往績PE計只係6倍，其他同業有由20倍至30多倍。今年股市大旺，盈利更會大升。
成交大增，股票行佣金水漲船高，今年6至8月，港股每日成交700至800億元，到9月打後，成交已升到過千億元，保守估計結好每月成交150億元計，單係佣金收入已超過1500萬元，全年1.8億元。
結好個孖展倉亦好大，「晒士」成15億元，每月利息收入亦有1500萬元，全年又係1.8億元。另外，集團的放債業務亦好活躍，估計一年收入超過2000萬元；再加上澳門金都酒店每年亦有9000萬元的保證溢利。早前集團出售九龍城露明道的投資物業，又獲利近1億元。
保守估計現年度（08年3月年結）盈利約4.2億元，每股加權盈利15.7仙，PE只係6.1倍，股價上升空間好大。
大股東增持有啓示
結好近期由0.60元急衝上1元水平，只係追回部份「失地」，近幾日走勢形成上升三角形，若衝破1元阻力，上升目標係1.40元，可在其破位時追入。
單係在11月，大股東洪漢文已5度在市場吸納，合共5100萬股，平均價由0.83元至0.97元，有啓示。