港股昨日大屠殺過一輪，恒指27000點大關仲不保，最低跌超過700點，股仔更曾掀過一陣「逃亡潮」。大市跌咗幾千點，午後卒之有反彈，倒升，全日升137點。
恒指由上月底高位31958掉頭急挫，短短10日內，足足跌咗5000點，跌幅15.6%，升得急自必然跌得快，但直插而落，跌得咁「甘」，好有可能係一次到底，噚日就似係單日轉向。
股仔呢輪算係有番勢，但噚日復牌嘅駿新能源（091）大跌逾5成，搞到人心惶惶，唔少股仔又被拋售，好在下晝個勢定番啲。噚日推介嘅結好控股（064），高開0.99元，但中段竟然插到落0.85元，大跌11%，午後逐步收復失地，全日跌5仙，走勢仍在整固中，等衝破1元阻力先跟進。
MP物流（8239）插得仲犀利，跌穿1元，落到0.86元先反彈，其後雖然有大盤護航，逐個位掃上，但元氣已傷，投資者對走勢飄忽嘅股份亦有戒心。
投資物業組合多元化
地產股全面回升，鷹君（041）收30.70元，升1.20元，升幅4%，反彈力度較勁，上月底曾見過33.95元，短線有機會重上高位水平。
鷹君擁有多元化的投資物業組合，包括寫字樓、商場同酒店，食正本港經濟蓬勃發展呢個大浪，租金同出租率都有可觀增長，預期未來一年旗下物業租金可再大幅調升。
07年度（12月年結）上半年，集團營業額19.13億元，升3.67%，盈利6.14億元，大升5倍，每股盈利1.02元，股東資金216.95億元，每股實值36.07元。期內酒店業務表現強勁、利息支出減少，以及冠君（2778）有一次性貢獻1.38億元。
大行睇好目標逾36元
上月初，集團以1.425億美元出售美國三藩市一幢18層高甲級商廈，獲利2800萬美元（約2.23億港元），令07年全年盈利可上升至10億元，每股盈利1.66元，以保守的22倍PE計，股價已可升上36.50元。
大行多看好鷹君前景，高盛維持買入評級，目標價36.10元不變；花旗則將評級由沽售調升到買入，目標價36.60元，仍較08年每股資產淨值有20%的折讓。