華華噚日去咗摩王黎汝遠嘅飯局，佢不時有斬獲，嚟緊下個月又搞祝捷會，地點揀咗喺九龍站Elements圓方一間酒家。咪睇摩王好輕鬆咁又話有斬獲，查實佢做咗好多功課，好似睇好九龍站上蓋豪宅凱旋門咁，先後都唔知去咗幾多次實地考察，試過有朋友跟佢去，行到腳軟，先知道摩王平時原來好勤力，跑好多路去睇樓，摩王亦因為咁同圓方嘅酒家熟絡咗。
講番個飯局，座上客當然唔少得摩王嘅「督導員」湯君明，呢位督導員果然盡責，喺飯枱上不忘提醒摩王，叫佢咪咁心軟，俾經紀𦧲吓就畀多啲佣金，摩王好受教咁頻頻點頭，十足老竇教仔。
同得摩王同湯生食飯，梗要攞啲買樓貼士，問到樓市點睇？摩王就話年底前都仲會升多十幾個巴仙，明年亦可以升多10至20%，佢個人睇好九龍站上蓋同西環一帶。
湯君明呢？佢都係鍾情西環，因為遲啲有地鐵站，佢仲自爆喺嗰區入咗啲丙級寫字樓，一於執平貨咁話。華華冇佢咁叠水，百零萬有冇得玩？佢就叫華華去上水石湖墟，話嗰度啲唐樓都幾筍，信唔信就自己諗啦。