噚日港股要跌大家預咗，藍籌股幾乎全線下挫。不過，就喺一片愁雲慘霧中，華華見到一線曙光，好彩香港仲有兩位李生出嚟力挽狂瀾。佢哋咪就係香港股神李兆基，同視富貴如浮雲嘅李嘉誠囉！
李四叔嘅旗艦恒基地產（012）雖然同大市一樣裂口低開，但冇幾耐就已經反彈，雖然唔捱到好耐又跌過，但喺晏晝開市，恒地又一鼓作氣升到全日高位68.9銀，不過，到尾市唔知係咪李四叔棄車保帥，獨撐一隻煤氣（003），所以恒地收市都要跌1.38%。至於四叔最愛嘅煤氣幾乎全日都逆市向上，雖然曾經一度失手，但最後都力保不失。
至於首富李嘉誠就更加一力撐起兩隻大藍籌，和黃（013）同港燈（006）噚日都逆市向上，同樣錄得1.2%升幅，撐住恒指。喺40隻藍籌股中，和黃、港燈同煤氣，係唯一錄得升幅嘅3隻藍籌，你話兩位李生幾厲害。
當然有啲投資者會話，港燈同煤氣都係公用股，出名喺跌市有防守力，發揮資金避難所嘅角色，但噚日電王米高嘉道理嘅中電控股（002）一樣要跟大市跌1.2%，所以話兩位李生梗有個人魅力。
中華電力頂唔住
不過，四叔嘅煤氣上升都有原因嘅，因為佢老人家嘅恒地提價向恒發（097）收購煤氣嘅39.06%權益，可見煤氣幾有吸引力。至於超人隻長實（001）同長建（1038）亦都分別下跌0.7%同0.2%。
雖然兩位李生一齊出手，但佢哋對後市就各有見解。大家仲記得四叔講過話「跌啲買啲」，聖誕過後睇三萬三嘅話，可以諗吓趁低吸納。至於超人就比較睇淡後市，近排頻頻沽售中資股，好似早輪就減持南航（1055）、中海集運（2866）同中國遠洋（1919），咁投資者究竟要信邊個富豪，就要自己諗。
網友唔領情
除咗華華見到李四叔同李超人一齊發功，原來網友一樣心水清，喺網上討論區，網友命硬好人見超人旗下嘅長實、和黃、港燈，同四叔嘅煤氣逆市升，就話：「誠哥出手救市啦，四叔都有呀，有希望啦！」
不過，領情嘅人唔係咁多，陀飛輪話：「誠哥四叔得鬼閒救市，咁好心就捐晒副身家出嚟啦！」北區C奶都唔信：「跌市前散貨，直情先知咁。」tonycf揶揄話：「佢哋啲樓每呎減100蚊都同你鍊過，救你？」
siupak覺得係陰謀㖭，「收市長實跌，咁即係引咗你哋入局。」hk_wing都係咁話：「長實同和黃升我仲驚，會唔會抽高股價準備配股呀？」886講：「誠哥嘅長實、和黃要托高抽水，四叔嘅煤氣係預咗恒發私有化成功。」joshfun就覺得，「大戶轉向投資地產，唔係兩李救巿。」
電郵：mailto:[email protected]