一單超市人踩人事故，揭露內地通脹嚴重程度，已發展至令人不安的水平。事故原因，係某超市為慶祝開店10周年促銷，將原價每桶49.90元的「菜籽沙律油」減價至39.90元，以8折價出售，民眾因而早於凌晨4時就到超市門前排隊，至超市開門時，數百人爭先恐後致出現慘劇。
翻查國內報章，其實今年中開始已屢見關於食用油急漲價的報道，而且升幅都以一成計，相當誇張。香港地好多人食米唔知價，柴米油鹽最貼市都係媽咪級，所以，要知通脹去到邊個地步，問問佢哋就最清楚。通脹嚴重，後果就係香港負利率加劇。
盈利能力料獲改善
食用油相關股有隻中國食品（506），其主要業務為油籽加工、酒類、飲料加工、糖果、小麥加工、製造及銷售啤酒原料、大米加工及貿易、分銷小包裝食用油，以及非大米類食物貿易。
里昂證券研究報告指出，中國食品自公佈中期業績後，股價大幅調整，而旗下具價值的長城酒業務，截至06年底的市佔率達22%，是內地的名牌，預期在生產管理、品牌，以及銷售中央化後，盈利能力可進一步改善，建議買入，目標價7.06元。呢隻紅籌股自從分拆中糧國際（606）上市後長期橫行，個市點升都無乜反應，到跌市時反而有點抗跌力，昨現長尾錘，低位唔怕買。
百威向高難度挑戰
提起中糧，估唔到竟然有公司轉型搞生物燃料業務，百威國際（718）上周宣佈斥資11億元收購江蘇省生物柴油業務，生物柴油廠房將分兩期完成，第一期完成後的產能將達10萬噸生物柴油，最終產能可達20萬噸。通告話收購目標會透過收購原料，包括菜油及棕櫚油，加工成生物柴油，淨係呢點已經令人覺得好奇怪，國內食用油經已短缺，點解仲容許加工變柴油？