瞓公屋、炒冷飯，兩位阿太出盡法寶拉票，葉劉噚日變身「巴士阿嬸」，朝早繁忙時間同市民一齊「迫」巴士返工，話要體驗一般打工仔之苦。巴士阿嬸由香港仔搭巴士去銅鑼灣，嘗過塞車滋味後，不禁大嗌「有壓力，未解決！」
香港仔搭到銅鑼灣
葉劉噚日一早出動，唔係搭由北角碼頭去蒲飛路嘅23號，而係殺入香港仔利東邨，乘搭去銅鑼灣摩頓台嘅96號巴士，不過中途喺香港仔隧道口落車，會合記者後再上車去銅鑼灣。香港仔隧道日日塞車，八方相信好多南區居民習以為常，已經麻木冇感覺，惟有早啲起身預鬆啲時間啦，葉劉卻好似發現新大陸，以為塞車係新聞。葉劉指隧道已經飽和，以佢所見架架巴士都好擠迫，而且部份路線，好似去中環嘅班次似乎唔夠頻密，難為市民日曬雨淋等巴士，又要好似沙甸魚咁迫巴士返工。
一般情況下經香港仔隧道去銅鑼灣僅五分鐘車程，繁忙時間隨時要間歇性封閉，塞15至20分鐘都唔出奇，葉劉認為隧道流量壓力大，南區對外交通問題多年未解決，所以支持盡快興建南區地鐵，佢又話地鐵唔會喺路面排放廢氣，對環境都好啲。葉劉搭巴士前，趁機喺巴士站拉票，現場所見反應唔錯，之後佢變身巴士阿嬸，喺車上同乘客傾偈，討論吓交通問題，可能大家都知呢啲嘢唔係講吓就可以解決，只係客客氣氣寒暄幾句就算。
葉劉平日揸「波子」跑車，噚日搭巴士對佢係新鮮經驗，佢坦言冇搭巴士好多年，以前做官時有司機接送，假期自己揸車，唔揸車多數搭的士，而且居住地點只得小巴途經冇巴士到，所以平日冇機會搭巴士，若非參選都體會唔到小市民迫車之苦。
可以組成「巴士孖寶」
「巴士阿叔」陳乙東一度聲言參選，但因冇錢畀50,000蚊選舉按金而唔成事，如果佢成為候選人，話唔定可以同葉劉組成「巴士孖寶」，阿叔、阿嬸齊齊大嗌「有壓力，未解決」，發揮聯票效應，其他對手真係聽到都驚。