花旗股市急跌，國內加銀行儲備金，港股昨日一開就唔見咗700點有多，跟住就坐滑梯繼續跌，埋單計數，恒指唔見咗1117點，國企指數都跌過千點。
花旗經濟差，又有通脹威脅，大跌唔使問點解，睇嚟仲有排跌。港股調整大勢已成，連突然減息都冇反應，即係話淡友已掌握大局，千祈唔好逆市而行，否則多多都唔夠輸，反彈追貨，係送錢畀人使，選擇性博反彈任何時間都得，不過要先問自己會唔會嚴守止蝕。國內股市都係玩向下，唔好諗住靠A股帶番起港股。
和黃C輪6580：和黃（013）昨收89.35元，逆市升1.1巴仙，暫時仍係支撐大市工具，有機上試93至95.5元，可以買啲6580短炒，隻輪昨收1.56元，槓桿率5.7倍（有效4.4倍），對冲值0.77，正股升上95.5元，6580應該唔會低過2.05元，正股跌穿86元止蝕。