十一月四日本欄講「真人不露相」，引述上海交通大學網站一啲材料，透露中文大學崇基學院化學系前系主任張雄謀博士係共產黨員。一位崇基化學系教授係張博士同事，睇完之後搵到一位朋友，間接通知左丁山，張雄謀早已退出共產黨，並非潛伏於中文大學之地下黨員，證據係張雄謀幾年前去世後，佢位公子在追思禮拜上致悼詞，講過呢件事。
朋友後來間接地搵到份悼詞，叫人傳真畀左丁山睇。張公子提及，高祖父、曾祖父兩代都中過進士、當過官，加上兒輩都放洋留學，所以家門貼有「父子進士全家，兒輩留學三洲」對聯。張雄謀受大姐影響，十六歲（一九三九年）加入中共，考入上海交通大學，擔任支部書記，做地下工作，四一年後被調派到蘇北農村，參加游擊戰，三個月後，申請返回上海，一九四三年退出共產黨，抗戰勝利後考上教育部自費留美，一九四九年得博士學位欲回大陸服務，但父母已逃難到香港，大力反對，於是張雄謀留在香港教書（新法與華仁）。一九五七年到崇基任教，直至退休。
戰前大學生因「理想」而加入共產黨，不足為奇，能夠如張雄謀博士咁，吃過苦後，就退出中共嘅，實在十分清醒，更好彩嘅係佢為人孝順，聽父母話留港不回上海，否則在文革時難免受批判鬥爭矣。
張博士之崇基化學系舊同事，對「真人不露相」一文，甚為緊張，要求澄清，茲澄清如上。
兩位讀者來函提及搵工轉工。讀者李話佢位公子自瑞士讀完酒店系，畢業回港，見工十餘次，仲係失業，覺得酒店業不肯畀機會予年青人。左丁山與酒店業人士傾過呢種個案，佢哋覺得年青人或者首先要檢視自己見工面試時嘅表現喎，佢哋真係搵人搵得好緊張呀。另一位年青讀者話在律師樓做LegalSecretary，上工冇耐就想轉工，但仲未有人請，問左丁山意見。正是人各有志，如你有興趣，可以轉工嘅，但正如你所講，每去見工，僱主都問同一條問題：「你點解咁快就想轉工呢？」不如做夠一年先至再諗啦。