噚日雖然陽光普照，但對於散戶嚟講，就過咗個「黑色星期一」。港股跟隨美股跌勢，全日跌咗1117點。睇番呢個幾月港股嘅走勢，鋪鋪星期一返工個市唔係升千幾點，就跌千幾點，最「弱」嗰次都升700點，唔知係咪上天驚大家放完weekend返工會悶呢。
好似今個月咁，如果大家唔善忘，上個禮拜一港股就狂瀉超過1500點。10月嘅5個禮拜當中，有4個星期嘅第一個交易日，都係全周升得最高，或者跌得最甘嘅一日，其中仲有兩個星期升超過1000點。
其實星期一股市大上大落係有原因，首先投資者可以賴美國，因為每次星期五，港股收咗市美股先嚟跌。除咗美股，好多時大陸都會喺星期六日推出宏調措施，好似啱啱人行加存款準備金又揀喺星期六，中外都等港股收市或者冇市嗰日先嚟夾擊，難怪星期一恒指升跌都咁甘。
有幾震撼
11月12日 恒指變幅：-1117
11月05日 恒指變幅：-1526
10月29日 恒指變幅：+1181
10月22日 恒指變幅：-1091
10月15日 恒指變幅：+702
10月02日* 恒指變幅：+1057
*當日為星期二，由於周一休市，故順延至周二