李彩華（Rain）噚日牛一，前晚佢喺銅鑼灣一間卡拉OK慶祝，有份出席嘅圈中友好包括黃百鳴、邱禮濤同江若琳等。阿Rain前晚以一身華懋小甜甜打扮出現，可能因為佢遲吓要拍亞視嘅新劇《火蝴蝶》，劇中佢演嘅角色影射已故華懋集團老闆龔如心，所以前晚佢以小甜甜造型出嚟，擺明係要幫套劇造勢。
生日之後，阿Rain就踏入24歲，佢話：「今晚嘅生日會，出席嘅嘉賓全部要扮成卡通人物，我唔係扮小甜甜，我係扮米奇個女朋友米妮呀！」有記者問佢今晚米奇會唔會出現，佢話：「唔知喎！如果你哋見到有人扮米奇，記得幫我影低相！如果今晚有人送鑽戒畀我，我梗係會收！」
重提舊情人
傾吓傾吓，阿Rain又主動提起舊男友丁子高，佢話：「丁子高喺上海返嚟後，我同佢見過面，仲講起啲感情事。」記者追問佢有冇問丁子高同楊千嬅拍拖嘅事，阿Rain就好避忌話：「唔多清楚！」問到丁子高俾人寫到係情場老千，佢就只係話：「我哋𠵱家係朋友關係。」
