噚日沙田跑香港盃預賽，好多有馬出賽嘅馬主一早向馬會申請，帶埋18歲以下子女入場，政務司司長唐英年愛駒「富士晨曦」有份出賽，佢帶埋三位千金入場打氣，反而乖仔就唔見。「富士晨曦」好生性，跑得零舍落力，終點前追過對手贏馬，幫唐唐贏到59萬頭馬獎金。
之不過港交所主席夏佳理名下嘅「超班」就唔係好爭氣，夏佳理帶埋乖仔入場預備拉頭馬，點知愛駒三甲不入。好彩老友唐司長贏馬，唐唐叫埋夏佳理父子一齊拉頭馬，齊齊happy。
拉頭馬兼贏59蚊Win
唐唐話早兩個禮拜名下另一匹愛駒「心福」喺跑馬地夜賽贏馬，當晚佢因為有要事在身，冇入場拉頭馬；噚日「富士晨曦」報捷，可以同一家人影張威水相補數，十分開心。唐司長話賽前對「富士晨曦」有一定信心，所以買咗少少Win，結果獨贏有59蚊，唐唐笑晒口話收穫認真唔錯。
喺八方記憶中，唐唐養馬多年，噚日係第二次同子女一齊拉頭馬，對上一次係04年國慶嘉年華賽馬日，當日馬會准許馬會會員帶埋18歲以下子女入場，唐唐全家總動員到場，結果「富士晨曦」贏馬，第一次全家一齊拉頭馬。