昨日本地有場「國際賽」，是為2010年世界盃外圍賽亞洲區第二圈預賽也，香港隊主場對土庫曼。個多星期前已在電台聽到有關廣告，宣傳重點唔係捧主隊場，而係由經濟角度出發的「抵睇」，話晒屬於國際賽，門票只收60元，同本地賽事一樣，本土式消費而有國際級享受也。
香港人現實又講效益，一個「抵」字，當然有點吸引力；但港人同時又夠醒目，去街市買菜，菜檔話5元一大紮，又平又抵呀，精明主婦卻不會輕易落搭，總會伸手翻翻那紮菜，睇清楚係咪底面都青青綠綠冇爛葉，然後才決定買不買。
世界廣大，足球水準差天共地，60元睇世界排名158的國家隊對香港，以「國際性」來作賣點，恐怕捉錯用神了。其實，橫豎都是給長者或學生買3送1優惠，不如將安慰獎聚焦變大成金多寶。美國有個馬場上個月出新招，搞學生觀賽贏獎學金計劃，大專生連續幾日入場，就可以參加獎學金大抽獎，送你1年學費也。鼓勵你參與賽事，又獎勵你讀書，大條道理名正言順，用在足球上，更不怕道學之士反對呢。
張美德
mailto:[email protected]