鬍鬚曾升任財爺後進駐壽山村道官邸，新居入伙接近一個月，噚日請傳媒家訪，但只限戶外活動，不准入屋參觀，佢又唔回應任何涉及公事嘅問題，成個下晝一味帶記者遊花園，好彩八方眼明手快，識破財爺官邸內有亁坤。
禁入屋齋遊花園
古人倒履相迎貴客，鬍鬚曾就成頭大汗見記者，身穿母校喇沙劍術隊T恤同波鞋，佢逢星期六返喇沙教劍，一班師弟經佢指點，𠵱家係學界第一劍咁話。閒話幾句後，一班記者想移步入屋參觀，點知鬍鬚曾叫停，聲稱傢俬未送到，暫時不便開放，大家只可以喺屋外花園同球場活動。
唔畀登堂入室，鬍鬚曾大條道理帶大家遊花園，介紹完屋旁塊田，又猛講玩籃球、排球、欖球心得，連詠春都想耍兩吓，記者問到有關任總日前要還富於民，同埋財政預算案會否派糖等問題，佢即時交波兼耍太極。唯一肯講嘅係佢已喺10蚊紙幣上簽名，遲啲新出10蚊紙會印上佢大名。
雖則鬍鬚曾唔畀人入屋，但好彩佢官邸透明度高，八方透過大玻璃窗窺探內幕，見到屋內茶几、枱、凳、書櫃等傢俬已齊備，其中一張枱擺咗個關公坐看《春秋》像，佢聲言純粹裝飾，「冇乜特別嘅啫。」八方問過一啲玄學師傅，有人話關公坐像俗稱文關帝，一般從商人士都愛擺放求財運，不過近年都有唔少蠱惑仔有樣學樣，擺個關公坐像喺夜場，話有助啲客坐低玩耐啲喎。
走廊擺放羅漢松
另一特別擺設係喺走廊有棵羅漢松，所謂「家有羅漢松，一世唔會窮」，財爺官邸都有棵，八方希望庫房繼續滿瀉。由於近年好多人相信羅漢松催財，所以香港野生羅漢松幾乎俾不法之徒斬光偷運內地賣，財爺太太亦叫記者唔好影棵羅漢松，話擔心曝光成為歹徒獵物。
言不及義遊一輪花園後，鬍鬚曾同太太送客前每個記者送包匡智會曲奇餅留念，有行家問佢點解唔派糖，鬍鬚曾指匡智冇糖賣，行家追問係咪暗示出年預算案冇糖派，鬍鬚曾就話：「曲奇餅同糖都係甜嘅。」有乜玄機，大家可以自行想像。
