唔少人買新樓，都係貪佢有靈活嘅付款方法，講到靈活，就不得不提長實（001）嘞，旗下嘅新盤按揭優惠可謂層出不窮，花款極多，就算近排個市旺成咁，佢哋喺馬鞍山嘅新盤嵐岸亦都賣到尾聲，仍不厭其煩推出優惠，今次個付款計劃叫「特長18零供款」，專為10個餘貨而設，頭5名買家可有180天特長成交期，同時喺成交後可享12個月免供款優惠。至於最後30個單位，發展商話留番入伙時加價再賣。
嵐岸未有現樓睇，示範單位設於紅磡都會商場，呢個場嘅主題係台北婚紗廣場，設有唔少同結婚相關嘅店舖，今個禮拜日仲搞咗個展銷會，準新人睇完樓，可以順便去睇吓。現場設有多家台北婚紗名店同婚禮服務公司，為準新人解答婚事疑問，喺指定商戶消費滿2000蚊，可參加抽獎，頭獎係飛躍台北HelloKitty夢幻之旅，啱晒準新人。
