話自己係全港最大有機及天然食品店嘅ThreeSixty，喺置地廣場同埋圓方落腳，吸引唔少注重健康嘅上班一族幫襯。小妹早排去置地廣場間ThreeSixty掃貨，諗住可以好放心咁去買一大堆有機果仁，放喺辦公室當零食。
辯稱擔心「顧客卻步」
點知開心去、激氣返。皆因小妹發現ThreeSixty兼賣無機兼無益、又鹹又有防腐劑嘅食品，而且數量鬼咁多，咁使乜幫襯ThreeSixty呢？去city'super或者Taste咪一樣！最激氣係ThreeSixty打住有機做生招牌，小妹就覺得俾人呃咗，於是即刻投訴，職員一味話唔好意思，又承認ThreeSixty唔單止賣有機食品。
ThreeSixty發言人話，佢哋賣嘅有機產品超過5,000件，佔貨品總數逾六成。咁即係有三成幾唔係有機啦，比例好高喎！佢又解釋，咁係因為市民未必完全接受有機飲食，ThreeSixty唔想因為只係賣市民唔熟悉嘅有機食品而令顧客卻步。又要走健康路線又要賣啲唔健康嘅食品吸客，仲要貴過人，點可以咁樣做生意㗎！想買有機食品，各位姊妹睇怕都要落足眼力睇真啲。
逢周一至周四刊出