唔講唔知，原來食物及衞生局局長周一嶽係壁球王子！八方平時見周一嶽西裝骨骨，戴住副金絲眼鏡斯斯文文，估唔到佢噚日參加壁球慈善賽，着番套運動裝即刻渾身是勁，仲替名人隊取得唯一一場勝仗㖭！
周一嶽讀書時係皇仁校隊好手，據講未做局長前一直有參加業餘聯賽，經常代表醫學界出征。周一嶽噚日賽後好謙咁話，對手練馬師葉楚航學打壁球唔夠一年，佢贏波理所當然。
名人隊另一隊員特首辦主任陳德霖都係皇仁仔，不過卻輸波而回。佢對手係香港壁球一姐趙詠賢，應該預咗輸。佢事後賴地硬，話打唔慣四面玻璃嘅場地，又指射燈太刺眼，輸波主因係自己年紀大，唔夠後生女好波。