梁詠琪（GiGi）的精采，來自她的愛情故事。
和鄭伊健及法籍男友Sly的兩段情，由始至終，GiGi都受盡狠批，不過她懶理，她說「世上最愚蠢的事就是想討好全世界」；你有你討厭，她有她態度，反正她的人生舞台不停公演連場好戲。下一個劇目早已拍板，是《等愛的女人》，她單身，還可以盡情去date。
自詡對愛情瀟灑的GiGi，對兩位舊愛有不同的解讀。和伊健相戀時，她有壓力，雖然伊健現已是不聯絡的朋友，但還是會祝福他和蒙嘉慧，那是她對自己最仁慈的做法；但她直認跟Sly相處合拍、快樂，是保持聯絡的好朋友。
7年情比不上3個月的愛，答案，相信會在GiGi給自己的情書內找到。
撰文：朱倬誼
從為鄭伊健慶祝生日、步出他西貢寓所的一刻開始，梁詠琪被外界轟她搶走邵美琪男友，這差不多成為她的死罪，往後她發生任何不幸事件，例如一年內先後和伊健及法籍男友Sly甩拖、內地演出撻生魚、樂壇頒獎禮上捧蛋，總惹來網民群起圍剿，一言總括「抵你死」，說話更難聽都有。
31歲的GiGi飽歷風霜，她聽慣狠批，成王敗寇只當作人生磨練，她淡然說：「我唔會介意嗰啲網上留言，任何人都有發言權利，既然有人用假名、假性別，唔負責任咁去留言，點解我要負責任、去理會呢啲說話？每個藝人都有人鍾意同唔鍾意，世界上最愚蠢嘅係你想討好全世界，呢個係missionimpossible（不可能任務），冇人會贏得全世界喜愛，你明白呢個道理，就唔會覺得自己有乜唔同，如果我為呢啲批評而覺得我冇用、真係唔好，不如唔好做，因為已經唔可能喺呢個圈子活得開心。」
「我學會了解自己」
挫折令GiGi成長，她自認信心多了，再不像從前的猶疑，從前的話題涉及兩個人，她想得多說得少，現在她一個人，卻想得少說得多：「過去嘅經驗令我學會了解自己，人輕鬆咗好多。朋友同我講，唔識你或者睇過某啲報道嘅人會好憎你、唔鍾意你，但認識你之後就會鍾意你；以前我好抗拒陌生人，會俾人以為我寸、冷傲，其實係我冇信心，唔識同人打成一片，𠵱家我信心多咗，可以skip一次生兩次熟，你有信心就會勇於喺陌生人面前表現真正嘅自己，呢個好難，唔係人人做到。」
和伊健拍拖，GiGi形容「這七年是一個不短的經驗」，受盡千夫所指，為愛情不無犧牲，但她說：「每個人都有唔同睇法，有人同情你，亦有人不屑，感情係兩個人嘅事，局外人冇權干涉，唔應該有任何judgement（判決），但太多人對我有唔同judgement嘅時候，我唔可以理解，傳媒又過度關注，呢層當然有壓力。」
「分手都可以快樂」
GiGi跟伊健甩拖後，依然保護他，沒有說他不是，她說：「我覺得唔應該，佢冇做錯，我都冇做錯，就算有唔啱，都係處理過程唔好；分手之後，最重要嘅係祝福對方，呢個係對自己最仁慈嘅方法，唔好以為分手一定唔愉快，分手都可以快樂，快樂係源自本身點去睇件事。」GiGi也樂意為伊健和蒙嘉慧送上祝福，她說：「我會祝福所有從前同我拍過拖嘅人，曾經一齊過，始終係種緣份，呢種緣份係好難得嘅，我會祝福佢哋同任何一個人一齊都開心。」
在GiGi心目中，和伊健的七年情原來比不上拍拖三個月的Sly，她說：「伊健係朋友，不過冇聯絡；Sly係好好嘅朋友，有聯絡，會約食飯。」但她沒想過和Sly再續未了緣，她說：「現階段唔諗喇，當時我哋係發展中，之後我拍《女人．本色》忙到六親不認，嗰個時候嘅我的確唔適宜拍拖，雖然同佢一齊好開心、好夾，但覺得做朋友比較舒服，所以保持聯絡，仲有就係——嘩！俾人影多幾次，係人都驚啦！」
「係人都鍾意拍拖」
不過GiGi仍是個等愛的女人，會繼續跟異性約會，她笑說：「係人都鍾意拍拖，我鍾意，但唔會恨，會順應緣份安排，我有約會，比較輕鬆，冇乜壓力，我一個屈尾十走去拍戲，都唔會覺得對人唔住，就算真係拍拖，我會視佢為最好嘅朋友。其實拍拖可以輕鬆、甜蜜，上次有太多來自四方八面嘅壓力喇。」
GiGi續說：「我唔會用陰影去形容以前嘅戀愛，所經歷嘅令我學會好多嘢，每次都令我學識點樣去更愛一個人，將來再拍拖，應該更加好、更加識得愛，陰影太negative（負面），呢啲經驗反而畀我positive（正面）嘅影響。」
情路崎嶇的GiGi，在事業上也欠運氣，每上樽頸位總跌落，樂壇頒獎禮又食白果多時，別人戥她灰，她卻說：「係我自己做得唔夠好，我會檢討；獎項我已唔在乎，獎之嘛，我哋唔係為工作而活，工作只為生活，我對生活要求唔太高，好容易滿足。」
下月21日GiGi將再戰舞台，於亞洲國際博覽館舉行演唱會，由大名娛樂製作，這是她相隔三年後在港再開騷，屆時她會性感示人：「都係舞台上嘅性感，配合舞台效果，最重要係好睇、有美感，我會好放，但如果無情白事要我着成咁，會好驚。」
哭笑10年「唔會回頭望」
今年是梁詠琪踏入樂壇10周年，驀然回首，好不精采。用她的樂觀態度看，得比失還多：「心血少啲都未必經得起我呢個精采人生，但對我嚟講，呢啲係生命中能夠承受得到嘅精采！我覺得係性格所致，你性格樂觀，乜事都唔怕；我呢10年嘅人生好似齣戲，哈哈，戲如人生，好峯迴路轉。無論我人生經歷點樣，喺台上跣低定係攞獎，都唔會回頭望，其實符合我嘅樂觀同勇往直前嘅性格。今日做完嘅事，聽日已成過去，不值一提，我好瀟灑嘅。」
在GiGi的人生舞台上，光榮過、愚蠢過、笑過、哭過，所經歷的，都讓她留下精采印記。
最光榮
「我覺得開演唱會最叻，每次開演唱會帶嚟嘅榮耀，我都會多謝自己，以前我覺得開演唱會impossible，我本身慢熱，點可能彈出嚟對一大班陌生人唱歌？我呢世人發夢都冇諗過開演唱會，但𠵱家我開第三次喇，應該要頒個獎畀自己啩？我上次個唱係04年，我買咗架車獎勵自己，今次我去上海開完演唱會，都買咗禮物，嗰時我啱啱搬屋，買咗10萬蚊傢俬。」
最愚蠢
「最愚蠢係用真名入娛樂圈，原來用藝名會方便好多。睇醫生，『梁詠琪請到乜乜乜！』好尷尬，太多人望；我試過搭飛機遲入閘，成個機場都知道梁詠琪喺嗰個閘口出現，所以藝人用藝名係啱嘅，但我已經唔可以改。入行時我冇諗過用藝名，又冇睇過風水，好盲舂舂。之前我唔係叫梁詠琪，真名係梁碧姿，我同細佬七個月就出世，體重得四磅，係早產孖胎，身體好弱，7、8歲時，媽咪為咗我嘅健康幫我改名，我重申：梁詠琪唔係藝名，係真名！」
最快樂
「最快樂係認識自己多咗，其實唔容易，唔係坐喺屋企就可以做到，要透過朋友、家人，佢哋就好似一面鏡，又或者一個人喺越陌生嘅情況下，先會越認識自己。娛樂圈每日都發生陌生嘅事，每日都有驚喜，會加速人成長之餘，亦加速認識自己，咁係好事、開心事。我了解自己後，就知道點去面對喺我身上發生嘅事。」
最傷感
「最唔開心係分手嗰段時間，其實市面上好多愛情戲都一樣，係普通女仔嗰幕戲。當時我冇歇斯底里，緣份盡咗，控制唔到，但呢件事帶畀我好嘅得着抑或一世不能回頭嘅遺憾呢？自己係可以控制嘅。我唔開心會打電話畀朋友傾偈，最重要係搵番自己嘅價值，不宜妄自菲薄。有人受少少挫折，覺得全世界都唔要我，一定要搵番自己。尋找嘅過程中，會更加認識自己將所有人生碎片併湊，到最後，你會見到一個更好嘅自己。」
攝影：陳俊強
協力：黎敏茵
化妝：YanChiu
髮型：ZivYeung@Orient4
服裝：PauleKa
場地：沙田麗豪酒店