本港著名古典家具收藏家葉承耀醫生好多珍藏，佢近期將部份藏品擺喺中大中國文化研究所文物館展出，展覽名為「燕几衎榻：攻玉山房藏中國古典家具」，共有72項展品，全部係明末清初家具。
罕有流傳民間
葉醫生指部份展品係宮廷御用傢俬，其中一件「御用嵌紫檀木百寶炕案」最珍貴。呢張御用炕案購自美洲，古時放喺床上用，亦可擺在地上。炕案由黃花梨木製成，中間嵌有紫檀木，仲鑲有唔少寶石，據講另有一張收藏喺北京故宮，流傳民間嘅絕無僅有。其他精品有雕工精細嘅衣架同全球最高古董衣櫃，葉醫生指大型古董衣架好罕見，因為好多人嫌阻碇，拆開當柴燒，𠵱家買少見少。
現年73歲嘅葉承耀係皮膚科專科醫生，喺家具收藏界無人不識，佢1988年開始收藏古董家具，後來繼承叔父嘅書齋「攻玉山房」，曾任收藏家會「敏求精舍」兩屆主席。
葉承耀唔願意透露藏品價值，但話03年曾賣出40件藏品，成交總額約2,262萬港元，單一件計最高價逾200萬港元，近年佢又四出尋找珍品，發現價錢飆升不少，好貨卻難求。
文物館朝10晚5開放，公眾假期閉館，展期至明年1月30日，查詢：26097416。