公民黨大狀吳靄儀係金庸小說迷，同好多人一樣，細個偷偷哋匿喺被竇追看金庸小說。佢噚日出席渣打書節同其他金庸迷分享睇小說體會，意有所指咁話，香港政壇有唔少好似《笑傲江湖》裏面嘅大反派岳不群嘅人物，口講支持民主，暗地裏卻講一套做一套。
吳靄儀為人厚道，冇講明邊個係「岳不群」。其實政客選舉前洗底、道歉，迎合選民賣口乖非香港獨有，有冇人對號入座八方唔知道，不過香港人相信睇得出邊啲人、邊個黨派係「岳不群」。
吳大狀對金庸筆下角色好有心得，佢話最佩服係黃蓉，因為佢用自己聰明才智去救人同度過險境。佢又話唔鍾意小龍女、王語嫣呢類不食人間煙火嘅女角，因為現實世界根本唔會有呢啲人，好唔自然同造作。