郭羨妮日前擔任《志雲上素》嘉賓，節目明晚播映。當主持陳志雲問郭羨妮對外界給她「狐妮」稱號有何睇法時，她坦言：「初初聽到呢個名嘅時候，我係好嬲，想話告佢哋，但過一段時間平心靜氣之後，覺得人哋講啫，唔係話你係就係，冇所謂。」
「初戀俾人破壞」
那麼郭羨妮可曾跟有婦之夫發生感情？她斬釘截鐵說：「我唔會考慮，因為太複雜，自己嘅初戀係俾人破壞咗，曾經受過呢啲傷害，一定唔會做呢啲事。」陳志雲指感情有時很難控制，但郭羨妮自言她可以控制得來，方法就是當對方不存在。
陳志雲說：「刻意避開一個人，即係對嗰個人有少少感覺，要控制，係咪咁嘅意思？」郭羨妮聞言笑道：「驚有事發生，所以離開、走。」陳志雲打蛇隨棍上追問：「陶大宇係咪其中一個？」但郭羨妮否認說：「係好朋友，拍劇嘅時候佢好關心我，當我妹妹咁照顧，拍完之後就散㗎啦。」郭羨妮強調沒有刻意避開大宇，至於被問到有沒有介入大宇的婚姻，她擰頭說：「我點解要咁做！」
「溫兆倫好錫我」
究竟會否拍劇無法抽離角色，對某個人有好感而傳出緋聞？郭羨妮說：「你一定唔可以憎你對手，發掘佢好處，然後代入角色去愛佢，喺戲裏面發揮嗰種感情。演戲係我工作，但返到屋企就洗帶。」至於有沒有跟對手發生感情，郭羨妮說：「咪就係我認咗嗰個囉。」陳志雲笑問：「點解鍾意溫兆倫？我識佢好耐，我諗唔到有乜你會鍾意佢。」郭羨妮聞言即力撐這位前男友說：「到𠵱家為止，我都會話佢係一個好人，外面傳佢好多嘢，話佢借錢，啲人成日問我佢有冇同我借錢，我真係可以好誠實話畀大家聽，佢真係冇問過我借錢，而且好錫我。」
只可惜，溫兆倫和郭羨妮經常異地相隔，加上郭羨妮對不停被傳媒追問感情生活感到很疲累，所以決定跟溫兆倫協議分手，而分手後至今她強調仍未有拖拍。
陳志雲追問是否有女朋友者不作考慮時，郭羨妮語氣肯定地說：「唔會，我覺得係好傷害人嘅事，我做乜要咁辛苦去爭啫？我覺得咁樣唔好。」但陳志雲卻質疑：「係咪㗎？唔好講得咁盡喎，你唔知聽日發生乜嘢事。」郭羨妮一臉認真答道：「我一定唔會，你放心啦。」陳志雲聞言遂抵死地笑說：「關我乜嘢事，點解我要放心？」令郭羨妮一時間難以招架。
撰文：林妃
