上個禮拜五，滙豐帶頭減息，星期六睇電視，已經見「供平過租」嘅樓盤介紹。的確，無論對於供緊樓嘅業主，抑或地產代理嚟講，呢個都係天大喜訊。不過，對於仲喺度㩒緊計數機，考慮緊好唔好買樓嘅人嚟講，就千祈唔好因為一句「供平過租」而倉卒行動。
要計按揭成本
敏妮自己都供緊樓，而且睇好嚟緊樓市會爆升，所以絕對唔反對人喺呢段時間買樓。之不過，敏妮覺得，喺買樓之前要搞清楚幾樣嘢。首先，你要搞清楚買樓為乜？
如果係自住嘅，最好有足夠資金先好入市，因為越供得長年期，你要畀嘅整體利息就越多。好簡單一條數，上去地產代理或者銀行網頁，搵個按揭計算機計吓，一層200萬嘅樓，同樣借七成樓按，即係借140萬蚊，以4厘息計，分20年還，總共要近64萬蚊息；分15年還，畀46萬蚊息；分10年還，只係畀30萬息。
息口變幻無定
如果你買樓係自住，又認同敏妮所講，儲夠錢先買樓，縮短按揭期限，咁即使縮到10年，呢段都係悠長歲月，你認為息口喺呢10年會唔變咩！
如果買嚟投資，敏妮唔反對人炒樓！更希望你係諗住用嚟「炒」而唔係長揸收租，之前敏妮都喺呢個欄講過，嗰啲所謂收租有幾多厘回報嘅宣傳或者報道，其實講緊只係表面回報，未扣除管理費、維修費呢啲成本，如果你嗰層樓係供嘅話，你仲要計埋前面所講嘅按揭成本。
喺香港買樓投資只可以博升值，既然係咁，所謂嘅「供平過租」，你就要小心解讀，如果你用嚟炒，咁供樓平唔平得過租樓，對你嚟講意義都唔大，因為你會希望貨如輪轉，盡快摩出唔使上會。
網誌： http://manlitalk.com/blogs/