上周五恒指收市升23點，表面上係好平靜，但實際上單日波幅高達840點，早市見個市升到咁勁去追貨的話，收市又係得個桔。除咗波幅大之外，上周五嘅市況特徵係中資股表現勁弱，市場似乎預知中央再會有宏調措施，結果上周六真係再調高存款準備金率。
較有表現的中資股，只得若干石油石化股，如中石化（386）升4.9%，中油（135）升4%。中石化勁升，除受惠石化產品加價外，應與大行效應有關。上周高盛發表報告，指亞洲區的上游和煉油成本持續上漲，而中國和印度天然氣消費增加，令上游和綜合類油股更吸引。
該行原本預期中國將延遲推出新的成品油定價機制，不利中石化，惟柴油短缺威脅，內地部門採取積極態度調整油品價格，紓減中石化經營壓力。該行預期，未來6個月內地有可能再度上調成品油價格，加上母公司注入上游資產，及人民幣升值等因素，故將中石化目標價由8.40元大幅上調至15.10元。
成品油價勢續上調
發改委上周分別調高汽油及柴油零售價9.16%及9.96%，為自03年沙士以來最大的一次性調升，是次調整，因原油價格急升，煉油企業卻無力加價，變成生產越多、虧損越大，連油站都唔賣油，因此相信成品油價會續向上調，中石化可趁今日跌市撈番多少。
美聯工商舖要昅實
銀行再減息搞到業主心雄，封盤反價不絕，令二手成交不增反減，不過香港人又點會放過炒嘢嘅機會？資料顯示，10月份金鐘至上環區的甲級商廈摩貨共有13宗，金鐘區佔9宗，其中力寶中心有6宗；有約一半摩貨更是在10月購入後即能在同月成功摩出獲利，一般有10至20%利潤。今年第3季商廈買賣登記宗數總計達859宗，按季增16%，成交多咗，美聯工商舖（8090）可受惠，股份近日成交增加，亦可留意。