久休復出嘅鄭秀文舉行首場演唱會ShowMi2007，好多睇過嘅Fans都喺自己個Blog留言話氣氛勁正，舞技一流咁話，錯失機會嘅真係走寶。最近終於等到DVD推出，仲標明係HD高清製作，月尾仲會推出Blu-ray版。雖然DVD賣到$188，但作為Fans淨係睇Sammi認真嘅演出，已經值回碟價！
記者：許福合
雙碟附卡拉OK
以演唱會DVD來講，鄭秀文ShowMi2007演唱會賣到$188，真係覺得有啲貴！製作方面可能都知道定價有點高，所以包裝方面落足心機，採用紀念冊模式開合，當中更包藏一本精美相集，作為SammiFans，絕對有收藏價值。而整套DVD採用雙DVD設計，Disc1全隻都係演唱會內容，內容超過1個半小時，絕對將8場演唱會精華都收錄在內；再加埋Disc2內的MakingOf及卡拉OK版，內容相當豐富。即使碟價偏高，睇完都覺順番條氣，覺得物有所值。演唱會當然唔少得大唱Sammi好歌，其實Sammi全場說話唔多，只係後半部有講到自己暫休期間心事，聽到Fans眼濕濕。
感受現場氣氛
演唱會雖然話以高清製作，但根據過往經驗，演唱會DVD版質素通常只比VCD好些少。今次鄭秀文ShowMi2007畫面其實都算水準之作，頭髮亦有唔錯細緻度，可惜仍有唔夾口形嘅問題。筆者反而比較欣賞DVD的剪接，鏡頭轉換效果唔錯，運用上亦比較多花款，令人睇落無咁單調。而Sammi選歌方面，新舊歌都有包括在內，而且好能夠切合當時氣氛，所以睇DVD版感覺好連貫，甚少冷場！尤其最後拿出一封由Sammi寫給Mi嘅信，鼓勵自己、替自己加油，現場唔少人都感動流淚，相信睇DVD版觀眾，都一樣可以感受到當時氣氛。
大唱心曲
PS3睇高清版片段
今次好多碟迷都忍住唔買DVD版，事關個個等高清Blu-ray版。PS3上一早已有相關片段供免費下載先睹為快，靚歌、氣氛已毋庸置疑，最重要嘅聲畫表現，的確令人感動，真係未見過咁清嘅鄭秀文（同埋Dancer姐姐），令演唱會賣弄嘅七彩燈光效果都可完美重現。
查詢：DVDPro（23326326）