無綫台慶頒獎禮舉行在即，黎諾懿今年共有四齣劇集提名飛躍進步男藝員獎，出道5年，論資排輩及實力，他都是獲獎呼聲最高的一個，而他也自言對今年獲獎抱有信心，認為《溏心風暴》中的唐至歡一角勝券在握。黎諾懿說：「我梗係恨攞啦，獎冇人唔鍾意。」
黎諾懿出身無綫第18期訓練班，畢業後多擔演路人甲乙丙的角色，捱了一年多的辛酸，其後因外貌似陳百強而被監製發掘，慢慢讓他擔演主線角色而為人熟識，時至今日已入行近5年，雖然演藝成績未算驚人，但黎諾懿希望付出的努力，會得到觀眾認同。
難忘母子決裂戲
其實黎諾懿是無綫力捧的新人之一，今年他獲安排接拍共150集劇集，有六套劇集推出，單是提名飛躍進步男藝員獎項的作品已有四套，包括《東方之珠》、《十兄弟》、《溏心風暴》及《緣來自有機》，黎諾懿說：「我對攞飛躍獎信心都大㗎，自己付出努力都差唔多係時候收成，今年咁多劇之中我最滿意係《溏心風暴》，尤其同飾演我阿媽關菊英母子決裂嗰幾場戲都好深刻，仲好記得劇裏面分別有三場戲我要俾菊姐兜巴摑面，每次都NG成5、6次，呢個角色同我過往演過嘅有好大分別，先做一個乖乖仔，後來要同菊姐對抗，有唔同層面。」
既然成為飛躍進步男藝員獎大熱人選，會否恨攞獎？黎諾懿直言不諱說：「恨㗎，獎冇人唔鍾意，等於錢一樣冇人嫌多。」黎諾懿還力撐《溏》劇說：「戲裏面無論男、女角色都演得好好，大家都好有發揮，今年又熱爆，所以我都睇好《溏心風暴》會成為今年台慶獎項大贏家。」
視崔建邦為勁敵
提到有份競逐飛躍進步男藝員獎的對手，包括無綫總經理陳志雲的寵兒崔建邦及王祖藍等人時，黎諾懿也坦言視崔建邦為勁敵，他說：「我都覺得崔建邦同高鈞賢以新人嚟計唔錯，尤其崔建邦喺主持方面做得好好，累積好多經驗。王祖藍就扮嘢天份好高，大家係唔同範疇嘅嘢。」
黎諾懿過往多扮演乖乖仔或鄰家男孩角色，他笑言期待能逐漸轉型擔當重要角色，他說：「過往畀人感覺比較小朋友，想未來會成熟啲，角色唔好再做人個仔，進入一個男人時期，而唔再係男孩子。」
採訪：卓寶花
攝影：陳順禎
娛樂資料庫：飛躍進步男藝人獎候選名單
候選人：王祖藍
提名作品：《同事三分親》
候選人：王貽興
提名作品：《最緊要正字》、《最緊要進步》
候選人：李思捷
提名作品：《強劍》
候選人：胡諾言
提名作品：《十兄弟》、《問題娛樂圈》
候選人：崔建邦
提名作品：《東張西望》、《娛樂直播》、《勁歌金曲》、《再會歡樂今宵》
候選人：高鈞賢
提名作品：《舞動全城》、《通天幹探》
候選人：黃長興
提名作品：《賭場風雲》、《舞動全城》
候選人：黃嘉樂
提名作品：《突圍行動》、《迎妻接福》、《舞動全城》
候選人：蔡淇俊
提名作品：《突圍行動》、《同事三分親》
候選人：黎諾懿
提名作品：《東方之珠》、《十兄弟》、《溏心風暴》、《緣來自有機》
資料來源：無綫電視
