公仔箱年年都會搵班當紅藝員影月曆，呢本月曆除咗實用之外，仲可以睇到好多公仔箱玄機㗎！簡直係當紅藝員排行榜，邊個in邊個out，一睇就知。最近出咗明年嘅藝員月曆，地位超然嘅「阿傘」當然有份，之但係，聽聞佢影相嗰陣搞到一肚氣，全程仲面黑黑㖭。
話說影相當日，公仔箱安排阿傘同「洋娃娃」、「雞姐」、「肥波」嗰幾個人一齊影相，福將肥波得寵企正中間，平時有乜大場面，阿傘必定企中間，今次要佢坐歪，佢梗係好唔高興，即場面黑，唧都唔笑。喺度監場嘅「數字小姐」睇到，仲好唔醒水咁叫阿傘笑吓，點知阿傘好唔畀面咁一句車埋去話：「我唔想笑，冇人叫到我笑！」搞到數字小姐好鬼冇癮。
Textby關仁
