賭王何鴻燊近排認真旺，上個月名下愛駒「爆炸」贏咗婦女銀袋賽，噚日另一匹「爆冷」仲威水，捧走二級賽香港盃預賽，頭馬獎金171萬，馬主佔7成，都有成120萬，獎金事小，攞彩事大！雖然賭王上台捧盃時，獎盃底座突然脫落，但無損佢嘅靚靚心情，攬住四太梁安琪鬼咁開心。
愛駒勝出，不過原來賭王噚日並冇落注捧自己場，何解？話說賭王噚日較早時間有另一場活動，去咗新界培僑書院，接受校方致送一個紫砂茶壺，答謝佢長期捐款。賭王話，一大清早去書院，嫌「書書聲」唔多老嚟，驚住「爆冷」同「爆炸」跑得唔好，於是就冇落注。
講開落注，賭王喺政治上落重注嘅澳門特首何厚鏵，呢排狀態認真麻麻，公開現身俾人問佢歐文龍案問到煩，冇咗連任時嗰種神采。鏵哥聽日會發表新一份施政報告，賭王又例牌做大預言家，「以我所知會做得好好㗎，可能會還富於民，我自己期望對老人、工廠工業、工人有多啲幫助，澳門嘅租金同人工實在太高，好難請人，相信特首有辦法㗎喇！」
預言鏵哥還富於民
澳門近年經濟好景，賭王預計鏵哥會推出派糖措施，佢仲引用香港金管局一哥任總早幾日嘅講法，「好似任生咁講，政府大把錢嘅時候，梗係要畀番啲市民。」原來任總都好有影響力，一句「還富於民係天公地道」，搞到連澳門都要照跟咁滯。
喺澳門街當然仲有廣大嘅市民睇住份施政報告有乜措施推出，當地民主派一早計劃喺12月20日回歸周年紀念日，發起遊行爭取民主。搞手之一嘅吳國昌同八方講，澳門人好知足，如果鏵哥派嘅糖夠多夠大粒，隨時會令遊行人數減少，但如果出現分派不均，有人攞得多，有啲人攞得少或者根本唔受惠，咁就肯定激發更多人上街。
讚習近平廣東話叻
講番賭王，對於近期中央嘅港澳協調小組換咗阿頭，曾慶紅變成「流水的官」，賭王大讚新上場嘅習近平，「好有經驗，廣東話好叻！其實佢呢啲太子黨，捱咗十幾年，𠵱家出頭係好應該。」計八方話，如果真係捱十幾年環境就會轉好嘅，八方又少不免要提吓普選，早嘅唔講，由97年回歸起等十幾年，咁係咪2012年就會有雙普選呢？咁嘅話八方都希望賭王講親都中囉。