前環運局局長廖秀冬一句交通費太貴，令佢嘅民望升上第一，冬冬嘅繼任人運輸及房屋局局長鄭汝樺就拍馬未追得上。據港大民意網站上月公佈，鄭汝樺只得25%支持度，民望喺一眾司局長中排尾二。
鄭汝樺噚日接受香港電台訪問時聲言唔擔心自己民望低，因為自己係新丁局長，市民唔識佢好正常。不過鄭局長可能都發覺自己真係低調過頭，所以罕有地透露咗少少私事。
佢話自己冇好似其他女高官咁冠夫姓，丈夫唔止唔介意，仲好支持佢。佢又話好珍惜同兩個分別18歲同20歲兒子嘅相處時間，無論工作幾忙，每晚7至11點都係家庭時間，寧願深夜先睇文件，每日只瞓五個鐘。