【本報訊】粉嶺公路奪命車禍中，的士司機疑高速切線釀禍慘死，被撞的拖車及巴士共有三人受輕傷，他們事後慶幸逃過大難。首當其衝的拖車司機湯先生撞上巴士後，及時扭軚衝落斜坡，慶幸撞樹，以免釀成大災難。
「見架的士喺右邊衝埋嚟，本能反應扭左軚避開，結果撞埋架巴士度。但即時諗到巴士上可能有好多乘客，繼續撞落去會好大鑊，所以立即扭番右軚。」湯先生受傷送院後表示，雖然意外發生於一囗間，但他思路仍然十分清晰。
「拖車轉返右軚後，即衝向路中分隔嘅斜坡草叢，但諗到架車會沿斜坡直衝落往元朗方向嘅路面，累到其他車，於是又扭左軚，撞到樹就停低。」湯在意外中僅受輕傷須留院觀察，事後表示要劏雞還神。
「呢種刺激一次就夠」
拖車上男乘客黃家偉形容意外時有兩種心情：「一撞車即時揸實車頂扶手，心諗今次死梗！但到架車撞樹停低，個人冇乜傷時，就覺得好刺激，不過呢種刺激一次就夠囉！」
至於九巴司機梁瑞興指入行13年從未遇上如此嚴重車禍：「見架的士撞欄反彈出嚟直撞埋去，坦白講當時真係嚇到不知所措，停低車後成個人呆咗，好彩四個乘客全部坐喺車尾，無人受傷都算好彩。」