時至今日，還流行「立冬補冬」的說法，古人認為此時萬物蟄伏，身體需要補充更多營養，亁燥冬日例必多吃補品，味蕾開始蠢蠢欲動，一於帶你試食騎呢滋補菜，黑啤烏雞、炸連皮田雞、蘋果燜羊腩等，聽落有點怪誕，食落有幾滋味？由試食兵團話過你知！
記者：盧家蕙 攝影：譚盈傑
Model：Viva、Penny、Alkin、Cathy@TheGroup
刁鑽滋補菜
九龍城南角道老字號火鍋店厚福館，打滾十多年，早已打響名堂，眼見小菜捧場者眾，最近終於「撈過界」，開設兄弟店「厚福館小廚」，以新派粵菜作招徠，注入令人意想不到的嶄新元素，為傳統小菜增添「異」彩。如首度登場的滋補菜系列，有連皮烹調的椒鹽田雞，及以黑啤混藥材燴竹絲雞，手法刁鑽，口味獨特，突圍而出絕非難事！
出位小菜揸Fit大廚圖哥說：「烏雞唔一定要用來煲湯，而花雕、玫瑰露可以煮醉雞，點解唔可以用黑啤煮烏雞！」至於椒鹽田雞，先風亁，再以生粉勁捽，才能洗走田雞皮的滑潺潺；為了令豬肺軟熟入味，經過繁複的冲洗後，還要蒸上個多小時，菜式是騎呢，但背後功夫着實不少，食客的不安感大可一掃而空。
小記找來四位為食鬼，組成試食兵團，大啖吃新派滋補菜，究竟邊款深得民心？邊款又擺極都冇人吼？即睇！
滋補度：5★滿分
評分：10分滿分
試食兵團
健力士烏雞$98
滋補度:★★★★
以健力士黑啤代替花雕，配合當歸、紅棗、川芎等藥材，燜上45分鐘，竹絲雞入口甘香軟滑，齒頰留有絲絲醉香，更具驅風、補氣活血等功效，燥底人則宜淺嚐。
一煲清
總評9分
Alkin：「黑麻麻，齋睇唔想食，聞落啲藥材味幾香，食落又OK喎！」
Penny：「好食過一般醉雞，先食到酒味，之後有陣中藥味，味道有層次。」
Cathy：「本來怕苦唔敢食，飲咗一啖汁就食唔停口喇！」
Viva：「個樣好衰，但烏雞肉質比想像中滑，好入味，唔苦！」
富士蘋果燜羊腩$98
滋補度:★★★★★
以富士蘋果燜羊腩，減淡了濃烈羶味，肉質更入味更富嚼勁；蘋果頗爽口，集肉香及清甜味香於一身，食完全身暖笠笠，深受兵團歡迎，可憐小記要撈煲底先搵到一小件。
橫掃蘋果
總評8分
Alkin：「羊肉好香唔羶，連唔食羊的我都入到口。」
Viva：「蘋果食到羊肉味，好得意。」
花旗參花雕豬肺$60
滋補度:★★★★
豬肺多用來煲湯，大廚打破慣例，烹調出花旗參花雕豬肺，花旗參清熱生津，豬肺養顏潤肺。豬肺軟滑，甘到入喉嚨，補而不燥。
好甘
總評6分
Penny：「只係食咗件芋絲已經勁甘，唔敢食豬肺，一定仲甘。」
Cathy：「豬肺好滑，帶有花旗參及花雕的香味，不過真係幾甘。」
椒鹽田雞連皮$70
滋補度:★★★
田雞滋陰解虛，這味椒鹽田雞，鮮有地連皮一起炸，先徹底清洗，再撲粉走油，田雞外皮即如薯片般香脆，肉質異常嫩滑，灑上椒鹽後，更見香口惹味。
似食炸雞
總評7分
Viva：「我覺得似食緊炸雞！田雞肉夠新鮮。」
Cathy：「卜卜脆梗係好食，應該幾熱氣，唔似滋補菜。」
厚福館小廚（23835913）
地址：九龍城南角道58號地下
有飯開！速速試食！
為食唔係罪，有免費餐唔食就罪大惡極，本版現正招攬試食兵團，由本版記者帶團員捐窿捐罅，食盡香港九龍新界，誓要你捧住個肚返屋企。講明先，團員奉旨出鏡，奉旨見報，怕醜者免問，有興趣請填妥以下資料，寄往將軍澳郵箱65368號《蘋果日報》「試食兵團」收。記住，唔係偷食，係明請你食，唔使抹嘴。
‧必須憑報紙上的參加表格才可以參加。