陳豪成為今年無綫視帝大熱，昨日他與去屆視帝鄭嘉穎一同宣傳，還在台慶獎座前合照，被主持笑稱二人進行交接儀式。面對視帝獎座，陳豪不禁作狀流口水，不過他轉頭聲言不恨攞獎，但他與鄭嘉穎在獎座前合照時仍顯得相當尷尬。
陳豪憑《溏心風暴》中「得得地」的角色問鼎今年無綫視帝獎座，且成為大熱人選，他昨日與去年視帝鄭嘉穎、蒙嘉慧（YoYo）及唐詩詠等於黃大仙出席「無綫40周年台慶巡迴展覽」，現場還展出17個總值190萬元的台慶獎座，當然包括視帝獎座。鄭嘉穎甫出現便不斷表示相信陳豪今年會得獎，後來他遞咪予陳豪發言時，主持故意說：「交棒儀式呀。」鄭嘉穎接着說：「講笑啫，未必我頒畀你㗎喎。」陳豪只好苦笑。
兩生不敢碰獎座
陳豪與鄭嘉穎其後被安排到獎座前合照，二人都顯得相當尷尬，而且不敢碰觸獎座，不過陳豪故意做出流口水表情搞笑一番，問他為何尷尬，他說：「唔係，唔掂得㗎嘛，近年啲獎越嚟越靚，好似奧斯卡獎咁。」問他何以扮流口水，陳豪說：「玩吓啫。」那麼是否恨得獎，他說：「唔係好恨，搞氣氛玩吓，係有希望得獎，但都係抱玩嘅心情。」
YoYo多謝梁詠琪
鄭嘉穎則說：「唔係尷尬，呢個獎都唔係我嗰個。」談到陳豪不敢碰獎座，他說：「可能係有啲人迷信，事先掂咗唔好，應該尊重佢嘅，佢唔想掂，我更加唔應該掂啦，我明知今年只會係頒獎嘉賓身份，所以心情好放鬆，𠵱家唔一定要攞獎先開心，觀眾認同最重要，我好明白陳豪嘅心情，舊年大家走勢平均，今年佢就可以輕鬆面對，我會祝福佢。」
此外，YoYo談到梁詠琪公開祝福她與鄭伊健的戀情，她說：「多謝佢，佢係一個好人，好開心嘅好女仔，我都會祝福佢，希望佢樣樣都好。」會否想梁詠琪快點找到合適對象，她說：「其他人嘅嘢我唔想講咁多，希望佢開開心心啦。」YoYo憑《通天幹探》角逐視后，但她表示沒信心，只希望以後不要演奸角，以免被市民憎恨。
採訪：卓寶花
攝影：林德雄
