伯南克前晚有嘢講，自然係人人昅實，結果係道指一度跌超過200點，好彩尾市有買盤掃高，收市跌幅收窄好多。
究竟伯南克講咗啲乜，令投資者咁驚？佢話經濟前景麻麻，信貸危機牽連嘅嘢好多，負面影響會繼續，但油價係咁升，加埋美元係咁跌，通脹威脅大咗，如果投資者對通脹嘅睇法有明顯改變，長期通脹預期會推高，咁意味啲乜？即係話到時長息可能會扯高，聯儲局可能要被迫加息，你話到時個世界會點？
新世界破位睇36元
技術上雖然昨晚花旗股市有反彈嘅機會，但係個大形勢好淡，彈高啲都係俾人沽，如果連彈都冇得彈，下禮拜一港股都幾危，27800嘅支持位隨時守唔住。
恒指升23點，本來個市冇咁硬淨，不過碰啱本地銀行追減息1/4厘，個市先至企得穩，不過上晝升嗰400幾點就蒸發晒，大戶又成功派一浸貨。
新世界C輪7634：新世界（017）昨收29.70元，升5.3巴仙，係隻強勢股份，大地主股最勁係佢，睇走勢可以炒上34元，破位睇36元，可以買新世界C輪7634短炒。
7634昨收93仙，仲有82日期，負溢價1.4%，對冲值接近1，即係話正股升幾多，隻輪大致上升番相同嘅比例，成交雖然只係一般，但咁價內嘅輪，屬正常，整體數據其實好吸引。
正股升上34元，7634應該喺1.36元水平，正股升上36元，隻輪應該升到上1.56元左右，正股跌穿27.80元止蝕。