香港人鍾意打機出晒名，無論家用定係手提遊戲機通通買齊，機舖更係唔少人嘅蒲點，每次有大作推出都會成為機迷話題。好似街機名作之一《鐵拳6》，就有好多人等咗好耐，最近竟然喺香港出現！不過地點唔係機舖，而係於11月7日至9日在會展舉行嘅「2007香港電子遊戲機國際產業展」，可惜展覽只招待業界，機迷最快要等到聖誕期間先有得玩！
記者：許福合
攝影：陳偉強
Model：Mandy
配32吋LCDTV開戰
今次喺會展舉行嘅「2007香港電子遊戲機國際產業展」雖然唔算大型遊戲展，不過亦有唔少即將推出的大作展出，而場內的遊戲基本上都係任玩，唔使入錢，鍾意玩街機的就認真過癮。
當中最吸引同最有睇頭，首推BANDAINAMCO《鐵拳6》，現場展出時，用上32吋LCDTV顯示，令到整台機器佔地唔多。最重要仲係顯示質素，配合使用同PS3相容底板，極高硬件支援下，畫面有高清級解像度，同時角色與場地細緻度及光影特效表現亦有提升。另外代理亦透露，系統可能會與日本稍有不同，採用卡機系統，預計可配合新增道具系統，並將角色資料儲存於卡內。
Rage隨時反敗為勝
《鐵拳6》將有同系列最多角色登場，新角色有中國風格少女及Leo，亦有特異技能印度Zafina。一如以往，每名角色都有特定風格，要熟習晒全部角色操作，就要交唔少「學費」。另外角色外觀系統亦大幅強化，可以更全面自訂角色外觀，玩起來份外覺得投入！戰鬥系統方面，《鐵拳6》加入全新Rage系統，當被人打到太傷達至一定程度，就會發動Rage，這時角色會被紅光包圍，攻擊力提升，分分鐘讓處於劣勢一方反敗為勝。真係對手未倒下，都唔可以放鬆！場地暫時可見有12個，部份場景會有動態環境，例如地板可以打破，讓雙方轉移到新場地戰鬥等。
SEGARaceTV噴射賽車撞人
另一款勁好玩新作係SEGARaceTV，雖然係賽車遊戲，不過並唔單調，加入咗好多新元素。賽車遊戲最基本要有速度感，RaceTV就相當唔錯，有時轉急彎，甚至覺得太快而難以控制。另外遊戲加入儲氣系統，當跑車以高速前進時，右下角就會有儲氣計，當達到一定標準，就可以使用噴射加速，而儲氣速度更係開得快加得快，隨時可連續加速，實在非常爽快！同時間，地面上亦有加速同減速路障，進入加速區就可以提高速度！而更過癮係可以撞人，當高速前進撞人時，甚至可撞到對手飛起，真係非一般賽車！
好玩預覽
《決戰名人榜》
換成台灣政界名人，讓你出力發洩痛打。
《MagicPanic》
專考玩家眼明手快，揸住個「吸塵機」一樣嘅手掣，要第一時間將彈出來的妖怪吸住。
《坦克大戰》
作戰時座椅會依據戰鬥場面移動，有真實感且提供中文介面，街機少見！
《WesternDreamGold》
推錢幣遊戲一種，特別之處係可調校錢幣推出角度，難度同可玩性皆提高。
《DiscoDream》
另一款推錢幣遊戲，外形比較壯觀同大型，主要留意控制錢幣流出節奏，較為簡單。
《魔框傳奇》
要在限定時間內射入最多入球，不過難處係籃框竟然會上下左右移動！
