星期一寫游泳在金錢洪流，英文應是swiminmoney，中間加多個the，謹此更正。
識英文多過識中文嘅小B傳來電郵，附一篇出自Craig'sList嘅網上文章，內容不知真假，但寫得十分幽默抵死，睇完冇法子唔笑。小B未夠二十五歲，雲英未嫁，可能對文章內嘅女主角十分反感。左丁山特登再傳過去畀就快名花有主嘅Y小姐睇，Y小姐即刻來電問：「你咩嘢意思呀？」
文章嘅女主角係一位女士X。女士X話自己二十五歲，自問生得標致美艷，有卡士，不俗套，住在紐約，想嫁一位有年薪五十萬美元嘅男士，佢話唔係貪心吖，住在紐約，年薪一百萬美元只算係中產階級啫；但係搵咗好耐，只係搵到一位年薪廿零萬嘅商人，冇資格住在中央公園西；冇法子再上一層樓，女士X條氣唔係幾順，因為佢見過唔少冇自己咁靚，冇自己咁識打扮嘅普通女人，都嫁到中產或以上嘅男人，生活十分優游喎。女士X公開徵求答案，究竟啲投資銀行家、對沖基金經理、有錢仔、大牌律師、醫生等等將喺乜嘢蒲點出現呀？
一位署名（唔知真定假）RobCampbell，摩根大通投資銀行部嘅男士回覆女士X。呢位男士答案好簡單，女士X呀，你自稱好靚，但頂多靚多五年，三十歲後就日日減值啦，三十五歲後更加冇嘢睇，換言之，女士X係一件須要折舊嘅資產，而我嘅賺錢現金流就年復一年咁長使長有。女士X只不過想做一單交易啫，以美貌換取一位年薪五十萬美元男士嘅婚姻，但以華爾街術語講，美女資產屬於buyandhold（持有），但會不斷折舊貶值。如果要做交易嘅話，不如只租（lease）不買，換言之，租到你滿三十歲！
呢位女士X，香港唔知有冇呢？大概經常出現於娛樂版嘅美女或者有呢啲心態，而啲名門公子就鍾意租（lease）而不買（marriage），故此久唔久就見到明星名公子分手嘅消息。諗諗吓，左丁山曾見過類似租賃行為，可惜位女主角懵然不覺啫。