阿里巴巴於星期二（十一月六日）上市，股價急升，低見二十八蚊，高位見三十九元九五，收市報三十九元八角五仙，與招股價十三個半比較，中籤幸運兒每手五百股賺一萬三千，直情笑到四萬咁口。
因而想起上星期六在中環街市外面大道中碰到投資S。八年前，科網股狂潮未起，投資S曾經向左丁山提起：「中國最叻嘅一個人，叫做馬雲。」當時左丁山對互聯網嘅認識有限，聽投資S講馬雲，實在聽到一嚿雲，後來知道佢間公司入股馬雲創辦嘅一個網站，叫做「阿里巴巴」。
眨吓眼過咗咁多年，適逢阿里巴巴上市，轟動全球，左丁山碰到投資S，梗係恭喜佢發咗大達。點知投資S冇乜表情，佢話：「投資係公司嘅事，與我無關，況且最初買入嘅股權，早已賣咗畀雅虎。𠵱家係睇人發達，自己冇份。」
做私募基金經理，痛苦莫過於此。因直接投資年期長，等回報需時甚久，基金持有未上市公司股票幾年之後，會被逼出售之，以符合基金之集資條款，出售之時，當然已經賺咗，但與接貨人之回報相比，有蚊髀與牛髀之分。更痛苦嘅，係原來負責投資之人，早已因為種種原因，自願或非自願地辭職他投，連carriedinterest都冇埋，見阿里巴巴」上市喎，似足林子祥首歌「阿里巴巴」開頭嗰句：令我每天傷心。
左丁山冇抽新股嘅習慣，阿里巴巴急升，完全冇自己份，睇報紙引述馬雲金句：「男人的長相往往與他的才華成反比。」幾乎拍案叫絕，馬雲生得人仔細細，聽講可與鄧小平相比，相貌當然差過周潤發、湯告魯斯，但智力驚人，能夠從無到有，製造一個阿里巴巴神話，才華直逼蓋茨、Jobs。以後經常俾女人睇唔起嘅「馬雲相貌」男士，大可引用馬雲金句。十餘年前，左丁山在馬場見到美女明星拉頭馬，丈夫在旁，一位女馬迷睇住電視機，望住電視講咗一句：「男人唔使生得靚仔嘅。」估唔到今日又睇見馬雲有類似講法，天下不美男，站起來，捧馬雲為偶像！