銀行水浸，迫不得已之下滙豐銀行都要帶頭減息1/4厘，優惠利率降至7厘，供樓P-3真係好平，再加埋租金係咁升，借錢買樓收租都仲有着數，呢個就係負利率帶出嘅現象，當你睇到啲炒家幾十個屋苑單位係咁掃，唔好以為人哋係亂炒一通。
銀行再減息，除咗買樓收租外，理應會再將銀行存款驅趕入股市，但係近期港股明顯升唔起，一則係港股之前累積升幅太勁；二則係港股升到咁上下，普遍股票的股息率已經唔足以吸引「好息」之徒。
搵另類高息股，偉易達（303）可以講係唔錯嘅選擇。偉易達去年賺1.83億美元，大升42%，折合14.3億港元，目前市值154億元，PE只係10倍多，論估值是十分吸引。
偉易達近年算係被市場遺忘，除咗因為中資股狂炒之外，美國經濟及消費市道令人擔心，不過偉易達主席黃子欣表示，北美市場銷情無受經濟影響，仍錄得近兩成增長，在大力發展新產品迎合市場下，電子學習玩具市場佔有率更超越主要對手。至於歐洲的庫存積壓問題，在首季已解決，定單開始跟隨消費景氣好轉而復蘇。
股息率6-7厘
保守預測，偉易達明年3月底止盈利16.5億元，升15%，PE9倍，是少有的平價優質股。近年公司資金充裕，又無擴充大計，管理層自然要提高派息，去年百分之百全數派回股東，今年即使將派息比率降至6成，股息率都有6、7厘，好過擺喺銀行蝕水。
現時股仔真係好難搵到一個好嘅炒賣概念，採礦概念因國策而好難再炒得起，黃金集團（1031）轉去蒙古搞地產，但市場反應平平，到最後，可能又係回歸香港地產概念。