北京奧運舉行在即，負責嘅北京市公安局為提高反恐及機動能力，更裝備咗第二代Segway。呢架當年令美國總統布殊失威全球，未開車已一仆一碌嘅兩個轆，嚟到第二代勁改行車設計，加入智能電腦自動保持重心，片彎、上斜、碌樓梯完全冇問題，難怪全球超過150個警局及保安單位都已採用，今勻布殊仔踩上去都可瀟灑到變哪吒！
記者：梁美甜
攝影：楊錦文
布殊今勻企得穩
SegwayPT受到全球廣泛認識都係多得布殊，事關01年佢諗住揸架SegwayPT去打波威威時，點知未撻車就企咗上去，結果梗係失晒重心喇，俾狗仔偷拍到佢一仆一碌，𤓓到爆不特止，仲令人質疑SegwayPT所謂嘅平衡性能。生產商再努力研究，終於有唔會跌嘅第二代誕生，不如布殊搵日再試吓啦！
每秒判斷重心100次
上一代SegwayPT（PersonalTransporter）於01年推出時已大受歡迎，通過把手上按鈕來操控，簡單不過但唔容易，唔熟又或手腳唔協調隨時炒車。第二代全新i2和x2型號更突破地使用LeanSteer轉向設計以及InfoKey無線遙控器。於腳踏位置內藏4個Rider-DetectButton，內置電腦每秒鐘運轉100次以判斷騎乘者嘅重心轉向而作出智能移動。新配置嘅InfoKey可置於手把上或隨身攜帶，有咗呢個遙控器，就可以隨意開關、設定速度同埋開啓防盜系統。
SegwayPT操控簡單，身體稍微前傾，令腳尖傳出訊息而加速，想慢就向後傾啦！轉彎的話只需要輕輕向左或向右郁吓個LeanSteer手把即可，記住係輕輕力就得，否則你可以強烈感受到佢超強敏感所帶來嘅強烈反應！
人肉扭沙林EasyJob!
Segway推出全新一代i2及x2款式，最大分別係前者可以喺城市內行走，LeanSteer能敏捷作出反應，喺人多車多情況下都可以靈活轉向，勁過牆頭草，入𨋢上斜就更加無問題。後者則專為越野崎嶇路面而設，特製嘅輪胎行泥路、沙路抑或草地都無問題，獨特嘅胎紋更唔會輾親啲草㖭！加上車身高而闊，令行走時更穩定，所以喺唔同地形路面上面扭沙林（即雪糕筒）都無問題，技術如Matt咁好仲可以用x2隨時上落樓梯㖭！
性能操控易車迷激讚
x2極速可去到19km/h，而i2極速則為20km/h，若換上鋰電的話，平路更高達38km/h！拍攝中見到有位鐵騎士昅咗我哋好耐，原來佢心思思好想玩，最後仲畀咗啲意見㖭：「以為好難揸，點知原來好易上手，速度OK，好玩！不過同電單車速度就梗係無得比啦。」
不過Segway好多地方勝過電單車，如冇廢氣，車細佔地少等，𠵱家油咁貴，用Segway代步真係一流。唯一問題係貴，最平3萬幾一部（包送貨、專人教用、保養及保險）。想過癮大可租部玩吓，費用由$1,250起，不過小心唔好喺公眾地方玩喎！
矜貴法拉利版
Segwayi2同x2幾萬銀都未係最貴，因為法拉利量產版仲貴，全球只有40部，係生產商專誠為法拉利60周年慶典而設計。人哋法拉利喺Maranello有廠有跑道鬼咁大，保安阿頭引入Segway嚟巡邏作保安，其中一位阿伯級保安靠佢係跑道範圍捉到個闖入車迷㖭！我試過喺法拉利官方網頁見到呢個限量版，當時賣成七千歐元，即七萬幾港紙㗎！
話你知：唔可以喺街行
新一代Segway共有6款，主要分別係唔同配備及輪胎，如球袋架、雜物箱等，最正係隨便搵個插頭就叉到電，15分鐘足可應付1.6公里。由於則重安全性加上靈活，全球有超過150個警局及保安單位用緊佢，限時又限人手兼有效率吖嘛！
可惜香港現時仍未批准Segway喺公眾場合合法行駛，一定要有電單車牌兼喺私人地方玩，今日嘅全部都係設計圖片，旨在話畀大家知新版Segway有幾掂啫。
話你知：成龍力撐
成龍大哥原來都係Segway粉絲，自己都有兩部咁多。當日港代理Matt就問大哥借咗套高球示範Golf款Segway，仲話大哥原先以為香港會係亞洲第一個有呢款車行嘅地方，點知事與願違。可以肯定嘅係成龍大哥不嬲都係咁有香港心囉。想睇吓大哥揸Segway嘅風騷片段，可以上呢個網址八吓嘅！
（ http://www.segway.com.hk）
