鄧麗欣（Stephy）喺新片《塚愛》中，除咗會黐頭套扮絕症病人外，原來佢仲會喺戲中同余文樂有一幕大膽嘅激咀床上戲，因為導演彭發要求嚴格，所以單係呢場戲，都竟然用咗3日時間嚟拍攝！
抽離唔到角色
由於Stephy同樂仔喺拍攝頭兩日都唔係好熟，而且Stephy之前都冇拍過呢類又攬又錫咁激嘅電影場面，所以佢哋埋位時，情緒都唔夠投入，點都入唔到戲，直到第3日，喺導演要求下佢哋終於成功。
扮演絕症嘅Stephy為咗討好老公樂仔，勉強自己同佢親熱，兩人喺甜蜜同痛苦嘅複雜心情之間錫錫同擁抱，拍攝現場嘅氣氛雖然一片靜寂，不過佢哋可以投入到，10分鐘後導演一聲cut，佢哋都似乎抽離唔到角色。樂仔話：「拍完呢場戲，我坐咗喺床邊喊，我真係好似覺得自己有個患咗絕症嘅太太咁，好痛苦！」就連Stephy都估唔到樂仔個人咁感性，Stephy話：「我認識嘅佢為人好搞笑，估唔到佢仲投入過我！」
