呢期中環最紅嘅人物，應該係阿里巴巴（1688）嘅馬雲，但論到祖國網絡界嘅靚仔，華華首推大陸最大互聯網搜尋器百度嘅董事長兼首席執行官李彥宏。佢噚日嚟咗香港，出席香港科技大學搞嘅講座，華華梗係第一時間一睹風采。
阿里巴巴帶挈散戶贏到笑，所以華華最想知百度有冇計劃嚟港上市，李彥宏話，喺大陸上市要受政策限制，所以唔排除嚟香港上，為將推出嘅電子商務業務融資，希望中國投資者有機會買到內地搜索公司嘅股票。
李彥宏喺外國留過學，講得一口流利英文。演講時提到「百度」個名嘅來源，話說佢唔想公司名叫搜乜搜物咁普通，而詞人辛棄疾嘅《清玉案元夕》「眾裏尋他千『百度』」，當中隱含咗尋找嘅意思，正好同公司性質配合。言下之意，「搜狐」呢個名算唔算普通呢呵？
唔驚公司股價跌
李彥宏仲講到，舊年同老婆去夏威夷玩，點知老婆好關心老公檔生意，度假都要上網check公司股價，見股價跌，就擔心問老公。李彥宏梗唔驚啦，話對公司有信心，短期價格波動冇意思。
睇吓百度呢三個月嘅股價，走勢強勁，升近一倍，最高曾見416蚊美金，噚日最新報395美金，就知李彥宏幾咁有遠見。