第時去到河北，如果見到「郭晶晶希望小學」，唔使覺得奇怪，因為呢間學校真係同郭晶晶有關。話說運動品牌李寧（2331）總舵主李寧，拉大隊接受《新浪網》訪問，話出年會推出「英雄榮歸」計劃，向08年奧運部份中國金牌得主致敬。
家鄉建小學當激勵
李寧首席執行官張志勇話，如果中國跳水、乒乓球或者體操隊嘅隊員，喺出年北京奧運攞到金牌，公司就會喺嗰位英雄嘅家鄉，捐錢興建一間以運動員名字命名嘅希望小學，通過奧運英雄榮歸故里，向家鄉教育貢獻力量。
張志勇仲話，揀喺佢哋家鄉興建小學，另一個原因係，藉此向佢哋起源地嘅年輕人宣傳運動，仲有就係希望用英雄感，激勵更多青少年參與運動。呢招真係既好睇，又實用，唔知香港政府會唔會考慮抄橋呢？