早前傳出緋聞的鄭秀文（Sammi）和何韻詩，竟在荒山野嶺公然通宵打game！原來二人應邀為亞洲遊戲展擔任代言人，名正言順合唱主題曲之餘，昨日凌晨更在將軍澳一山坡拍MV，一身紅衣女戰士打扮的Sammi舉劍決戰軍look阿詩，雖然後者獻殷勤，但阿詩的緋聞女助手Vicky同場侍候，Sammi則被TB女助手包圍，令這座斷背山七國咁亂。
何韻詩和女助手Vicky被傳關係曖昧，日前卻傳出鄭秀文介入，隸屬同公司的Sammi和阿詩最近成為第6屆亞洲遊戲展代言人，並合唱主題曲，昨日凌晨更在荒山野嶺拍MV，上演一幕大戰。一頭紅髮的Sammi化身紅衣女戰士，阿詩則以中性造型示人，這對緋聞情人由凌晨3時拍至今早9時也未收工，原本她們奉旨對足幾粒鐘，但阿詩身邊有Vicky傍實，Sammi又獲TB女助手及梅艷芳生前經理人王敏慧（Marianne）等大班人侍候，難怪阿詩表現避忌。
慘被飛蛾嚇親
昨日凌晨，Sammi和阿詩到將軍澳一山坡拍MV，錄影花絮時，阿詩向Sammi細心遞咪，Sammi則以手指篤她頭部，每有空檔又影合照，未幾Vicky露面跟實阿詩，同時Marianne又到場探班，二人才各有各忙。
其間Sammi補妝，被飛蛾嚇得嘩聲尖叫，馬上挨向髮型師求救，其後穿高跟皮靴的她走過卡板，同行TB女助手馬上攙扶，令尾隨本欲扶她的阿詩甚為沒趣，至天亮時，依然生猛的阿詩終有機會跟Sammi吹水，更失驚無神拿出一個士巴拿，逗得Sammi哈哈大笑，不過因攝製隊發出噪音影響附近居民遭投訴，導致警方兩度到場了解。
首合唱感興奮
阿詩表示首度跟Sammi合唱，由她親自作曲，Sammi則笑說：「等咗30年終於出冊，同阿詩合唱好開心，阿詩係天后，冇乜時間同人合唱，我係本年度最佳女新人。」阿詩說：「我想同Sammi合唱好耐，兩個女仔唱情歌唔係咁好，所以呢次加咗rock嘅元素喺歌入面。」另外，工作人員出動兩名替身代她們拍打戲，又在山坡放了硫磺以防有蛇出現，不過Sammi仍被一隻兩吋長的黑黃蜂嚇到嗌救命，幸獲阿詩相救，Sammi說：「阿詩都唔驚昆蟲嘅，成日拎住啲鬚fingfing吓。」
採訪、攝影：娛樂突發組
