風流公子趙世曾成日俾人話佢對女友孤寒，實情係點就見仁見智，不過趙公子闊佬自己就一定㗎嘞，呢排佢就非常疏爽，豪擲超過600萬，買入超豪華嘅勞斯萊斯PhantomEWB房車，仲配襯佢英文名Cecil嘅自組車牌CEC1L，雖然英文字母i用咗數目1嚟代替，但驟眼睇嚟冇分別，絕對係靚車配靚牌。
火紅戰衣襯貴車
趙公子本身擁有唔少名車，但大部份比較高齡，好似佢成日坐開嘅白色勞斯萊斯開篷車都有15年車齡，估唔到佢今次咁闊綽，買新車兼買新牌。早幾日佢司機就揸住呢部落地兩個禮拜嘅新車，喺凌晨1點幾送趙公子同女友許冬梅（Wendy）夜蒲中環，當晚趙公子身穿筆挺西裝，一面濃妝嘅Wendy着紅色連身裙，佢哋一落車就齊齊企喺部名驅旁邊，確係架勢。
一身ball場戰衣嘅趙公子同Wendy，原來係夜蒲Dragon-i，但唔知係咪太多人入場，佢哋着到咁靚，竟然蒲咗15分鐘就撤退，喺中環兜個圈就上番車離開。
其實趙公子部勞斯萊斯幻影系列EWB，車身長過普通版250毫米，車廂後座大咗，車主又可以自訂各種車廂設施，包括超豪嘅頭等機艙座位及玻璃隔音屏障等，即刻有番晒私隱，仲坐得舒服過人㖭。