噚日港股跟隨美股急挫948點，睇恒指圖，由10月初抽上到家吓，弊！恒指圖形成「頭肩頂」格局。除非你甘於一世靠向財經名嘴問冧巴，如果唔係，炒股梗要學睇圖。咪畀啲技術分析嘅名稱嚇壞，其實睇圖有何難，華華幾道板斧都夠行走中環。今日華華開得班授徒，梗唔會叫你死讀書，靚女養眼，華華自創一套股市人體學，教你睇body賺money！
首先就梗係講講家吓個市。乜嘢係「頭肩頂」？有名你叫頭肩頂，就即係有head有shoulders，個圖形係由左肩、頭、右肩同頸線組成，當出現頭肩頂，大市短期內會調整。所以下次睇到靚女好似海潮溫碧霞咁show晒對膊出嚟，就要小心！
最開心見靚女倒豎葱
淨係華華講有啲兒戲？華華問過專家亨達集團研究部董事黃敏碩，佢話，港股最近急跌，係投資者反應過敏，雖然美國受次按問題困擾，但最近公佈嘅經濟數據都唔差，內地嘅經濟狀況亦冇轉差，所以後市即使出現調整，相信喺27500至28000點會有支持。
有「頭肩頂」自然有「頭肩底」，即係靚女玩倒豎葱，見到咁嘅情況，就係大市跌勢見底逆轉，一旦確認，上升幅度會好大。
圓底vs圓頂
靚女有個結實圓渾嘅股，對於男人嚟講，真係好吸引！喺恒指圖如果見到渾圓嘅底部，即係圓底，就更加吸引，即係大市見底，大升市好快嚟。仲有一樣要留意，底部形成時，成交量會減少，投資者可趁低吸納。
有圓底就有圓頂，即係話大跌市即將殺到，嚟緊後市嘅跌幅將會好大。當圓形頂部形成後，成交量會逐漸減少，投資者就要小心，應該有咁快得咁快沽貨走人。
雙頂vs雙底
即係咁，呢個世界最索嘅女人，當然係好似黎姿咁，有對「愛美神導彈」，但越索嘅女人，就越有殺傷力。喺股市上又何嘗唔係，技術分析裏面有所謂「雙頂」，顧名思義，形成兩個高位，好似兩座並排嘅山峯，代表見頂機會好高，後市偏淡，投資者應把握時機，盡早離場。
有堅挺雙峯係索，相反，人老雙峯下垂，「雙頂」變「雙底」，對女人嚟講就擇使啲！但喺股市上面就真係越「墜」越美麗，反映後市見低，好快回升，投資者不妨低位收集，等待嚟緊嘅升勢。
三頂vs三底
即係咁，人有老中青三個階段，至索就梗係揀手兼嫩口嘅時候，三十零歲就有另一番成熟韻味，不過，有番咁上下年紀導彈都開始向下。圖表派有三頂同三底，簡單嚟講，只要你明乜嘢叫雙頂同雙底，就好易理解三頂同三底，佢哋只不過係雙頂雙底嘅變奏，形成嘅時間耐啲，再出現多一個頂位或者底位，同樣係出貨或者入市嘅訊號。
以三頂嚟講，就同女人一樣，第二個頂比第一個細，第三個就比第二個細，老縮吖嘛，除非你第二度發育啫！
mailto:[email protected]